109-cu Pulitser mükafatının laureatları məlum olub

ABŞ-ın Kolumbiya Universitetində 109-cu Pulitser mükafatının laureatları açıqlanıb. Ədəbi nominasiyanın qalibi Persival Everett olub, o, Amerika klassikası olan Mark Tvenin “Heklberri Finn”in istehzalı və bacarıqlı şəkildə yenidən nəzərdən keçirilməsi - “Ceyms” romanına görə mükafatlandırılıb. Burada Hekın sərgüzəştləri onun yol yoldaşı, qaradərili qul Cim nöqteyi-nəzərindən göstərilir.

Publika.az xəbər verir ki, hələ Pulitser mükafatını almamışdan əvvəl “Ceyms” romanı “The New York Times Book Review”, “Esquire”, “W Magazine”, “Bustle”, “LitHub” kimi nəşrlər tərəfindən ilin ən yaxşı kitabı kimi tanınıb. Ekranlaşdırma hüquqlarını “Universal Pictures” alıb, layihənin prodüseri isə Stiven Spilberq olacaq.

Ən yaxşı elmi-populyar kitaba görə 2025-ci ilin Pulitser mükafatı sovet dissident hərəkatının tarixindən bəhs edən “Ümidsiz işimizin uğuru şərəfinə” əsərinə görə amerikalı tarixçi Benjamin Natansa verilib.

Bundan əlavə, jurnalistika sahəsində müstəsna nailiyyətlərə görə 15 mükafat verilib. Bu mükafatlardan ikisi 2024-cü il iyulun 13-də ABŞ prezidentliyinə namizəd Donald Trampa sui-qəsd ilə bağlı baş verən hadisələrin işıqlandırılmasına görə “Washington Post” komandasına və “New York Times” fotoqrafına verilib.