NASA müəmma ilə üz-üzə qalıb: 60 il əvvəl...

Təxminən 60 il əvvəl xidmətdən çıxarılan NASA peyki qəfildən radio siqnalı yayıb.

Publika.az xəbər verir ki, bu barədə "arXiv" platformasında dərc edilən araşdırmada deyilir.

Bildirilir ki, 2024-cü ilin yayında aşkar edilən sirli radio siqnalı Kurtin Universitetində (Avstraliya) astronomları çaşdırıb. Partlayış yaxın sahədə vaxt gecikməsi analizindən istifadə edərək lokallaşdırılıb və onun mənbəyi uzun müddət istismardan çıxarılan Amerika peyki "Relay 2" olduğu ortaya çıxıb.

Bildirilir ki, "Relay 2" telekommunikasiya peyki NASA tərəfindən 1964-cü ildə buraxılıb. O, 9 iyun 1967-ci ildə iki transponderin sonuncusu sıradan çıxdıqdan sonra fəaliyyətini dayandırıb. Avstraliya alimləri hesab edirlər ki, “ölü” peyk kosmik tullantılarla toqquşma və ya elektrostatik boşalma nəticəsində siqnal ötürüb.

Siqnal çox qısa idi, cəmi 30 nanosaniyə davam edib.

"Biz çox həyəcanlandıq, yeni pulsar və ya başqa bir şey tapa biləcəyimizi düşünürdük, lakin onların təhlili onun mənbəyinin kosmosda sürüklənən "Relay 2" olduğunu təsdiqlədi.", - astronom Klensi Ceyms deyib.

Adəm