Elm adamları ŞOKDA: Çernobılın mavi itləri... - FOTO

Tarixin ən dəhşətli nüvə fəlakətinin baş verdiyi Ukraynanın Çernobıl şəhərində insanların təxliyəsindən sonra geridə qalan itlərin nəsli bu gün yaşayır.

Publika.az xəbər verir ki, bu barədə UPI məlumat yayıb.

Bir çoxunun tükləri qeyri-adi maviyə çalan rəng almış bu heyvanlar elmi və humanitar maraq obyektinə çevrilib.

Qeyd edək ki, "Futures" Fondu artıq bir neçə ildir ki, onları xilas etmək üçün müalicə və sterilizasiya edir, həmçinin radiasiyanın onların görünüşünə və genlərinə təsir dairəsini araşdırır.

Bildirilir ki, 1986-cı ildə baş vermiş qəzadan sonra on minlərlə sakin məcburi şəkildə evlərini tərk edərkən ev heyvanlarını buraxıblar. Ərazidə sağ qalan itlər sərt şəraitə uyğunlaşaraq populyasiya ediblər. Onlar tərk edilmiş binaların və köhnə elektrik stansiyalarının yaxınlığında yaşayır, turistlərin və işçilərin qoyduqları yemək qalıqları ilə qidalanırlar. Alimlər fərz edirlər ki, onların dəri və tüklərinin mavi rəngi ya radiasiyaya məruz qalma nəticəsində yaranan mutasiya, ya da təcrid olunmuş populyasiyada yerləşmiş genetik əlamətlərlə əlaqədar ola bilər.

Qeyd olunur ki, bu itlər üzərində aparılan araşdırmalar uzunmüddətli radiasiyaya məruz qalmanın canlı orqanizmlərə nəinki görünüşünə, həm də dərin hüceyrə strukturlarına necə təsir göstərə biləcəyini anlamağa imkan verir. Alimlər bu heyvanların adi itlərdən nə ilə fərqləndiyini müəyyən etmək üçün DNT analizi üçün artıq qan və toxuma nümunələri götürüblər.

Fond bildirir ki, onlar təkcə elmi cavablar axtarmır, həm də bu heyvanları təhlükəsizlik və qayğı ilə təmin etməyə çalışırlar.

Adəm