Qlobal xam neft ehtiyatları ilə bağlı həyəcan təbili çalındı

ABŞ və İran arasındakı münaqişə fonunda qlobal xam neft ehtiyatları rekord sürətlə tükənir.

Publika.az xəbər verir ki, bu barədə "Bloomberg" agentliyi məlumat yayıb.

"Goldman Sachs" şirkətinin ekspertlərinin qiymətləndirməsinə görə, Hürmüz boğazının davam edən blokadası ilə əlaqədar görünən neft rezervləri artıq 2018-ci ildən bəri ən aşağı göstəricilərə yaxınlaşıb.

"JPMorgan Chase & Co." şirkətinin qlobal xammal tədqiqatları şöbəsinin rəhbəri Nataşa Kaneva qeyd edib ki, yaranmış vəziyyət yanacaq qıtlığı və birjalarda qiymətlərin kəskin artması təhlükəsini yaradır. O vurğulayıb ki, dünya enerji sisteminin əməliyyat minimumunu qorumaq üçün müəyyən həcmdə resurslara ehtiyacı var, bu səbəbdən İndoneziya, Vyetnam, Pakistan və Filippin kimi dövlətlərdə tədarüklə bağlı kritik problemlər artıq bir aydan sonra başlaya bilər.

Bundan əvvəl bildirilmişdi ki, Amerika Birləşmiş Ştatları, İsrail və İran arasındakı münaqişə dünya üzrə ərzaq qiymətlərinin kəskin artmasına səbəb olub. Qiymətlər son üç ilin maksimumuna çatıb.

Hüseyn İbadlı