İsrail İrana hücum edərsə, neft bu qiymətə olacaq

İsrail İranın neft infrastrukturuna hücum edərsə, neftin qiyməti bir barel üçün 100 dolları keçə bilər.

Publika.az TASS-a istinadən xəbər verir ki, bunu Rusiya Xarici İşlər Nazirliyinin MDBMİ Universitetinin Beynəlxalq Enerji Siyasəti və Diplomatiya İnstitutunun direktor müavini, iqtisadçı İqbal Quliyev deyib.

Quliyev xatırladıb ki, İran gündəlik hasilatı üç milyon barelə çatdıraraq bərpa edə bilib. Bu həcmin təxminən 50 faizi ixrac edilir. İran neftinin tədarükü kəsilərsə, qiymətlər yüksələcək. Eyni zamanda, Xarq adasındakı əsas ixrac terminalı İran üçün xüsusi əhəmiyyət kəsb edir və Tehran ən çox onun təhlükəsizliyindən narahatdır. Çin İran neftinin əsas alıcısı olaraq qalır.

İsrailin neft obyektlərinə cavab zərbəsinə gəlincə, Quliyev hesab edir ki, onların güclü iqtisadi təsir göstərəcəyi fakt deyil. Lakin bu, iki dövlət arasında qarşıdurmanı daha da gərginləşdirəcək və genişmiqyaslı hərbi toqquşmaya çevrilə bilər. Bundan əlavə, İran dünya neft ehtiyatlarının təxminən beşdə birini təmin etmək üçün istifadə edilən Hörmüz boğazını bağlamaq imkanına malikdir.

Adəm Abbaslı