Neftin qiyməti ilə bağlı sensasion proqnoz - Martın sonunda nə baş verəcək?

“Mart ayının sonunda neftin qiyməti bir barel üçün 150 dollara çata bilər”.

Publika.az xəbər verir ki, bunu “Kpler” tədqiqat şirkətinin Yaxın Şərq energetikası və OPEK+ üzrə analitik mərkəzinin rəhbəri Amena Bakr CNN-ə verdiyi müsahibəsində bildirib.

Ekspert qeyd edib ki, əgər Hörmüz boğazının mövcud blokadası davam edərsə, neftin qiyməti asanlıqla həmin səviyyəyə qədər yüksələ bilər.

ABŞ Prezidenti Donald Trampın münaqişənin sona çatması ilə bağlı qarışıq bəyanatlarından sonra neftin qiyməti bir barel üçün 100 dollardan aşağı düşsə də, Bakr vaxtından əvvəl nikbinliyə qapılmamaq barədə xəbərdarlıq edib. O vurğulayıb ki, Yaxın Şərqin bir neçə neft hasil edən ölkəsi boğazdakı təhlükəsizlik təhdidləri səbəbindən hasilatı dayandırıb.

Ekspert əlavə edib ki, Trampın boğazdan keçən gəmilərə ABŞ Hərbi Dəniz Qüvvələrinin dəstək verəcəyi ilə bağlı son vədləri bu əsas gəmiçilik marşrutuna inamı bərpa etmək üçün kifayət etməyib:

"Biz gəmilərin bir gecədə birdən-birə cəsarətləndiyini görmürük. Yalnız Trampın münaqişəni demək olar ki, bitirdiyini bəyan etməsi gəmilərin boğazı keçməsinə və bazar etibarının bərpasına səbəb olmayıb".

Hüseyn İbadlı