Dünya gərginlikdə, Pekin ticarətdə: İran nefti Çinə axır

ABŞ və İsrailin İrana qarşı hərbi əməliyyatlara başlamasından sonra Çin İrandan təxminən 12 milyon barel xam neft alıb.

Publika.az xəbər verir ki, bu barədə "CNBC" məlumat yayıb.

Tədarüklər əsasən Hörmüz boğazı vasitəsilə həyata keçirilib. Tehran bu marşrutla Çinə ən azı 11,7 milyon barel xam neft göndərib.

Neft daşımalarının izlənməsi üzrə xidmətin həmtəsisçisi Samir Madani qeyd edib ki, bu daşımalar Yaxın Şərqdə hərbi əməliyyatların başlanmasından sonra aktivləşib.

“Kpler” analitik şirkəti də həmin dövrdə İrandan Çinə göndərilən xam neftin ümumi həcmini təxminən 12 milyon barel səviyyəsində qiymətləndirir.

Bununla belə, ekspertlər bildirirlər ki, son dövrlər tankerlərin son təyinat nöqtəsini dəqiq müəyyənləşdirmək getdikcə çətinləşir. Analitik Noy Xin Soy vurğulayıb ki, Çin son illərdə İran neftinin əsas alıcısı olaraq qalır və daşınan həcmlərin böyük hissəsinin də bu ölkəyə yönəldiyi ehtimal olunur.

Qeyd edək ki, İran rəsmiləri daha əvvəl Hörmüz boğazından neft ixracına mümkün məhdudiyyətlər tətbiq oluna biləcəyini istisna etməyiblər. İnqilab Keşikçiləri Korpusunun sözçüsü Sərdar Naini bildirib ki, ABŞ və İsrailin davam edən hərbi əməliyyatları fonunda ölkənin silahlı qüvvələri regiondan neft ixracının qarşısını ala bilər.

Xatırladaq ki, Çin Hörmüz boğazı vasitəsilə daşınan xam neftin ən böyük idxalçısı olaraq qalır. Ötən ilin birinci rübünün məlumatlarına görə, bu marşrutla gündəlik təxminən 5,35 milyon barel neft idxalı Pekinin payına düşüb.

Adəm