Gömrük ərazisinə gətirilən mallara yeni qayda tətbiq ediləcək - GÖMRÜK BORCU...

Gömrük ərazisinə gətirilərkən gömrük rüsumlarından və vergilərdən qismən azad edilən mallarla bağlı gömrük borcunun hesablanması zamanı əvvəllər ödənilmiş məbləğlər də nəzərə alınacaq.

Publika.az "Ajans"a istinadla xəbər verir ki, bu qayda gömrük rüsumları və vergilər üzrə müəyyən güzəştlər tətbiq olunmaqla sərbəst dövriyyəyə buraxılan, eləcə də həmin ödənişlərdən qismən azad edilməklə müvəqqəti idxal xüsusi gömrük proseduru altında yerləşdirilən mallara şamil ediləcək.

Belə mallar sonradan sərbəst dövriyyə üçün buraxılış gömrük proseduru altında yerləşdirildikdə, onların gömrük rəsmiləşdirilməsi zamanı gömrük borcu yenidən hesablanır.

Bu zaman əsas məqam ondan ibarətdir ki, həmin mallara görə əvvəlki mərhələdə ödənilmiş gömrük rüsumları və vergilər nəzərə alınır.

Başqa sözlə, malın əvvəlki gömrük rəsmiləşdirilməsi zamanı ödənilmiş rüsum və vergilər yeni gömrük borcu hesablanarkən nəzərdən kənarda saxlanılmayacaq.

Eyni qayda güzəştlə gətirilmiş malların məhv edilməsi zamanı yaranan qalıq və tullantıların gömrük rəsmiləşdirilməsinə də tətbiq ediləcək.

Belə ki, mal məhv edildikdən sonra qalıq və tullantılar yaranarsa, onların gömrük rəsmiləşdirilməsi zamanı gömrük borcu hesablanarkən həmin mallara görə əvvəllər ödənilmiş gömrük rüsumlarının və vergilərin məbləği nəzərə alınacaq.

Beləliklə, qaydanın əsas məqsədi eyni mala görə əvvəlki mərhələdə ödənilmiş gömrük rüsumları və vergilərin sonrakı gömrük hesablamalarında nəzərə alınmasını təmin etməkdir.

Qeyd edək ki, yeni qaydalar sentyabrın 3-dən qüvvəyə minib.