İdman

Braziliyalılardan Messiyə təklif: Gəl iz qoy

20 Dekabr 2022 14:23

Rio-de-Janeyro İdman İdarəsinin rəisi, "Marakana" stadionunun administratoru Adriano Santos növbəti dəfə argentinalı hücumçu Lionel Messiyə müraciət edib.

Publika.az xəbər verir ki, o, 35 yaşlı hücumçuya ayaq izlərini əfsanəvi Braziliya stadionunun Şöhrət Zalına təqdim etmək üçün müraciət edib. Santos Messiyə hörmətlə yanaşdıqlarını bildirib:

“Messi artıq öz dəyərini meydanda və meydandan kənarda sübut edib. O, uzun illər futbol tarixində ən yüksək pillədə olan futbolçudur. Dünya kubokunu qazanmaq gözəl və qalib karyeranın tacıdır. “Marakana” da ona hörmətlə yanaşır. Axı Messi sadəcə bir futbol dahisidir”.

2019-cu ildə də Messiyə bu təklif edilib. Həmin vaxt bu məsələ barədə futbolçuya yalnız şifahi formada müraciət edilib.

Qeyd edək ki, Pele, Qarrinça, Ziko və Ronaldinyo kimi futbolçuların ayaq izləri "Marakana"nın Şöhrət Zalında yerləşdirilib.

Heybət