Mərkəzi Bankın faiz qərarı milli valyutanın evini yıxdı

İngiltərə Mərkəzi Bankının (BOE) 2009-cu ilin mart ayından bu yana ilk dəfə faiz endiriminə getməsindən sonra funt sterlinq dəyərdən düşüb.

Publika.az xəbər verir ki, hökumət “Brexit”-dən sonra Böyük Britaniya iqtisadiyyatını dəstəkləmək üçün atılan təşviq addımları çərçivəsində faiz endiriminə gedib.

Funt-sterlinq doqquz üzvü olan Pul Siyasəti Komitəsinin faizləri 25 bənd endirmək qərarından sonra 16 valyuta qarşısında dəyərdən düşüb.

Qeyd edək ki, BOE faizləri rekord səviyyəyə - 0.25%-ə endirib. BOE Sədri Mark Carney və Mərkəzi Bank rəsmiləri dörd ildən bu yana ilk dəfə qiymətli kağız alışı hədəfini artırıb. 375 milyard funt-sterlinq səviyyəsində aktiv alış proqramı 60 milyard funt sterlinq (79 milyard dollar) artırılaraq 435 milyard funt-sterlinqə yüksəldilib.

Bu arada faiz qərarı “Bloomberg”in sorğusuna qatılan iqtisadçıların gözləntilərini qarşılayıb. Sorğuda iştirak edən 52 iqtisadçının ikisi istisna olmaqla hamısı faiz endirimini proqnozlaşdırıb.

Toplantıdan sonra funt sterlinq 1.5 faiz düşərək 1.3131 dollar səviyyəsində əməliyyat olunub. Funt-sterlinq avro qarşısında 1% zəifləyərək 84.53 pence (peni) səviyyəsinə enib.

İqtisadiyyat şöbəsi