Venesiya Film Festivalı başlayır - Açılış filminin adı AÇIQLANDI

Ən qədim beynəlxalq kinofestival olan 81-ci Venesiya Film Festivalının bu gün İtaliyanın Lido adasında açılırşı olacaq.

Publika.az xəbər verir ki, bu barədə festivalın saytında bildirilir.

Açılış filmi rejissor Tim Burtonun 1988-ci ildə çəkilmiş filminin davamı olan yeni işi - "Beetlejuice Beetlejuice (2024)" olacaq.

Bu il festivalın əsas proqramına 21 film daxil edilib. Onların arasında Tilda Svinton və Culian Murun baş rollarda çəkildiyi ispan rejissoru Pedro Almodovarın “Qonşu otaq” filmi, amerikalı rejissor Todd Fillipsin Xoakin Feniks və Ledi Qaqa ilə birgə rol aldığı “Joker” filminin ikinci hissəsi, avstraliyalı Castin Kurzelin Jude Lav ilə birgə rol aldığı “Order” filmi, eləcə də Çilili rejissor Pablo Larrainin "Mariya" filmi var.

Əsas müsabiqə proqramına həmçinin italyan rejissoru Canni Amelionun “Döyüşdən sonra”, fransız rejissorları Lüdovik və Zoran Buchermin “Və onların uşaqları”, norveçli Daq Yohan Haugerudun “Məhəbbət”, Luka Quadaqninonun “Qəribə” kimi filmləri də daxildir.

Builki əsas müsabiqənin münsiflər heyətinin sədri fransız aktrisa İzabelle Huppert olub. Münsiflər heyətinə həmçinin amerikalı rejissor Ceyms Qrey, britaniyalı Endryu Ha , polşalı Aqnişka Holland, braziliyalı Kleber Mendonça Filho, mavritaniyalı Abderrahmane Sissak , italyan Cüzeppe Tornatore, alman rejissor Culiya fon Haynz və çinli aktrisa Zhang Ziyi daxil idi.

Film festivalı sentyabrın 7-dək davam edəcək. Tədbirin sonunda mükafatlar təqdim olunacaq: ən yaxşı film üçün Qızıl Aslan, ən yaxşı rejissor üçün Gümüş Aslan, ən yaxşı aktyor və aktrisa üçün iki Volpi kuboku, ən yaxşı ssenariyə görə Ozella mükafatı, ən yaxşı gənc aktyor və ya aktrisa üçün Marçello Mastroyanni mükafatı və Münsiflər Heyətinin Xüsusi Mükafatı.

Festivalın qaydalarına əsasən, “Volpi Kuboku” “Qızıl Aslan”ı almış filmin aktyor və ya aktrisasına verilə bilməz. Müasir qaydalar mükafatların bir neçə film arasında bölünməsini qadağan edir.

Hüseyn İbadlı