Teylor Sviftin adı həşərata verildi: səbəbi təəccübləndirdi - Foto

Amerikalı müğənni Teylor Sviftin adı bu dəfə elm dünyasında əbədiləşdirilib.

Publika.az xəbər verir ki, Kaliforniya Universitetinin alimləri Avstraliyada aşkar edilən yeni həşərat cinsinə ifaçının şərəfinə “Swiftiephylus” adını veriblər.

Yeni cinsə dörd növ daxildir. Növlərin latın dilindəki adları Teylor Sviftin albomlarına və yaradıcılığına uyğunlaşdırılıb. Bunlar “Swiftiephylus taylorae”, “Swiftiephylus amator”, “Swiftiephylus intrepidus” və “Swiftiephylus poetorum”dur. Bu adlar müğənninin "Lover", "Fearless" və "The Tortured Poets Department" albomları ilə əlaqəlidir.

Alimlər yeni həşərat cinsini 1995-2004-cü illərdə Avstraliyaya təşkil olunan ekspedisiyalar zamanı toplanmış 593 nümunənin araşdırılması əsasında təsvir ediblər. Həşəratlar Miridae fəsiləsinə aid edilib.

Tədqiqatın həmmüəllifi Sara Şredder Teylor Sviftin uzun illərdir pərəstişkarı olduğunu bildirib. O, yeni cinsə bu adın verilməsi ilə müğənninin adını elm sahəsində də yaşatmaq istədiyini deyib.

Şredder həmçinin həşəratların açıq rənginin Teylor Sviftin səhnə obrazını xatırlatdığını qeyd edib.