“Eşref Tek” ən çox ona güvənəcək - FOTO

“TimBi” şirkətinin istehsalı olan “Eşref Tek” serialının aktyor heyətinə daha bir ad əlavə olunub.

Publika.az Türkiyə mətbuatına istinadla xəbər verir ki, aktrisa Ecem Simge Yurdatapan ekran işində rol alacaq. O, səkkiz bölümdən ibarət layihədə "Sude" obrazını canlandıracaq.

Süjetə əsasən, "Sude" "Eşref"in ən çox güvəndiyi və sadiq əməkdaşlarından biri kimi tamaşaçı qarşısına çıxacaq.

Qeyd edək ki, Ecem Simge Yurdatapan Türkiyə tamaşaçılarına “Mucize Doktor” və “Aile” seriallarından tanışdır. Aktrisa “Mucize Doktor”da "Harika Turşucuzadə", “Aile” serialında isə "Aysel" obrazına həyat verib. O, həmçinin “Hayat Sırları” serialında "Tuba Türkkan" rolunu ifa edib.

18 mart 1995-ci ildə İstanbulda anadan olan Yurdatapan Mimar Sinan Gözəl Sənətlər Universitetinin Dövlət Konservatoriyasının Teatr fakültəsini bitirib. Sənət fəaliyyətinə teatr səhnəsində başlayan aktrisa 2016-cı ildən etibarən televiziya layihələrində də yer alır.

Türkiyə mətbuatının yazdığına görə, “Eşref Tek” serialının çəkilişlərinə Kipr səhnələri ilə start verilib. Layihənin ssenarisini Ethem Özışık, Lokman Maral və Ozan Ağaç qələmə alır, rejissoru isə Uluç Bayraktardır.

Hüseyn İbadlı