Hərəkət, cəsarət və ilham ili: Qırmızı at o kəslərə ziyan vuracaq ki...

Qarşıdan Çin təqviminə görə odlu qırmızı at ili gəlir. Bu il ay təqvimi ili 17 fevral 2026-cı ildə başlayacaq və 5 fevral 2027-ci ildə başa çatacaq.

Çin astrologiyasında at hərəkət, sürət, azadlıq və müstəqilliyin rəmzidir. Od ünsürü bu xüsusiyyətləri daha da gücləndirərək güc, qətiyyət və hərəkətə çağırış qatır. Bu cür birləşmə hər 60 ildən bir baş verir və buna görə də 2026-cı il bir çox başlanğıclar üçün xüsusi və taleyüklü hesab olunur.

Köhnəyə bağlı qalanlar geridə qala bilərlər

Odlu at ili adətən sürətli dəyişikliklər və cəsarətli qərarlarla əlaqələndirilir. Bu il təşəbbüs göstərməyə, risk etməyə və vərdiş olunmuş çərçivələrdən kənara çıxmağa hazır olan insanlar üçün əlverişlidir. Xüsusilə peşəkar sahədə - startaplar, innovativ layihələr və karyera sıçrayışları üçün uğurlu dövr ola bilər. Bununla yanaşı, il çevikliyi də tələb edir: köhnəyə həddən artıq bağlı qalanlar geridə qala bilərlər.

Yüksək aktivliyə baxmayaraq, il ərzində tarazlığı qorumaq vacibdir. Sürətli həyat tempi və impulsiv qərarlar emosional və fiziki tükənməyə səbəb ola bilər. Buna görə də istirahət və şüurlu şəkildə yavaşımaq uğurun əsas şərtlərindən biri olacaq.
Şəxsi həyatda Odlu at ili məhəbbət və güclü emosiyalar gətirəcək. Gözlənilməz tanışlıqlar, alovlu münasibətlər və əlaqələrə yenidən baxış mümkündür. Azadlığa canatma daha qeyri-ənənəvi münasibət formalarına maraq yarada bilər. Cütlüklər üçün isə bir-birinə daha diqqətli olmaq tövsiyə olunur: od enerjisi həm yaxınlaşdıran, həm də münaqişə yaradan amil ola bilər.
İlin əsas rəngləri qırmızı və qızılıdır. Bu çalarlar enerji, uğur və rifahı simvolizə edir. Onlardan interyerdə və bayram bəzəklərində də istifadə etmək olar. Məkanı ağac, keramika və ya metal kimi təbii materiallardan hazırlanmış at fiqurları ilə tamamlamaq da məsləhətdir.

Qırmızı at irəliyə doğru hərəkət, cəsarət və ilham ilidir.

Ədalət tərəfdarları üstünlük qazanacaqlar

Astroloq Səbuhi Rəhimli deyir ki, qarşıdan gələn qırmızı at ilində Avesta təqviminə görə Xeyir və Şər qüvvələri eyniləşəcək: “Ötən dövrlərdə zalımlar daha üstün olurdu. Amma indi güc balansı eyni səviyyəyə qalxacaq. Bu isə qızğın mübarizələrə səbəb olacaq. Təxminən may ayına qədər davam edən mübarizədə ədalət tərəfdarları üstünlük qazanacaqlar. Amma onu əldə saxlamaq da asan olmayacaq. İlin astronomik işarəsi olan at gücü məqsədyönlü səyləri simvolizə edir. Yeni dövr həm dinamizm, həm də çətinliklər gətirir. İlin simvolu həvəs, sürət, qətiyyət təcəssüm etdirir. Alovlu at enerji, hərəkət və transformasiyanı simvolizə etdiyi üçün il boyu gərgin anların da olacağını göstərir”.

Odlu at dualistdir

“At inanılmaz dözüm, güc və iradəyə malikdir”, - deyən astroloq bildirir ki, bu işarə altında doğulanlar öz dəyərlərini bilirlər, dostluğa həvəslidirlər, sevgi dolu olmağı bacarırlar, sədaqətli olmaqları ilə seçilirlər: “Atla yaxşı münasibət qursanız, yəni qarşıdan gələn illə düzgün davransanız, heç bir problem yaşamayacaqsınız. O, sizə söykənəcəyiniz bir çiyin təklif edəcək, vacib, mühüm məsləhətlər verəcək. At ili bir çox müsbət dəyişikliklər vəd edir. At həmişə irəli qaçmaq və həyatdan zövq almaq istəyir. Od elementi ilin xüsusiyyətlərinə bir az da rəng verir. Odlu at dualistdir – həm isidir, həm də yandırır. Buna görə də təhlükələri nəzərə almaq lazımdır”.

At o kəslərə ziyan vuracaq ki...

“Astroloji mənbələrə görə, qırmızı at ilinin üzərinə düşən əsas vəzifə milli, dini və mistik məsələlərin həllidir. İnsanları narahat edən qlobal problemlər, dünyanın gərdişi, insanların birləşməsi, vətənimiz olan Yer kürəsinin qorunması 2026-cı ilin əsas öhdəliklərindən biridir”, - deyə Səbuhi bəy vurğulayır.

“Bu il ədalət tərəfdarları, yüksək bilik sahibləri, incəsənət adamları, ilahi missiyaya xidmət edənlər, yəni ruhanilər, ilahiyyatçılar, möminlər, bir sözlə, tanrıya sığınanlar üçün uğurlu olacaq”, - deyən Səbuhi bəy bildirir ki, əgər hər kəs “Avesta”da deyildiyi kimi, xeyirxah sözə, əmələ xidmət etsə, bəxtləri gətirəcək. At o kəslərə ziyan vuracaq ki, neqativ işlərlə məşğul olurlar.

Qəfil yüksəlişlər və enişlər dövrü

“At ilində qəfil yüksəlişlər də olur, qəfil enişlər də. Bu il tanrı sevgisini ürəyində gəzdirənlər, yaxşı olanlar gözləmədiyi halda zirvəyə qalxa bilərlər. Amma rahat ömür sürüb, başqalarına zülm edənlər, Allahı unudanlar acı nəticəylə üzləşə bilərlər. At ilində bütün bunlara hazır olmaq lazımdır. Bu il standartdan kənar olaylar da mümkündür. İnsanlar baş verənlərin məntiqini anlamaqda çox çətinlik çəkə bilərlər”, - deyə astroloq qeyd edib. ("Kaspi" qəzeti)