Nüfuzlu telekanal Azərbaycan paxlavası ilə bağlı material yayımladı - VİDEO

Nüfuzlu “Euronews” telekanalı Azərbaycan paxlavası ilə bağlı videomaterial hazırlayıb.

Publika.az Teleqraf-a istinadən xəbər verir ki, materialda paxlava Novruz bayramının simvollarından biri kimi təqdim edilib.

“Paxlava çoxqatlı şirniyyat olub Novruz bayram ilə sıx bağlıdır, ortaq mədəni ənənələri əks etdirir. Onun reseptləri nəsildən-nəslə ötürülür, bayramlar zamanı hazırlanır.

Azərbaycan paxlavası ölkədə geniş yayılmış ənənəvi şirniyyatdır. Nazik xəmir qatlarından, qoz və ya digər çərəzlərdən ibarət içlikdən və şirin şərbətdən hazırlanır. Bu şirniyyat kulinariya ənənələrinin uzun illər boyu qorunub saxlandığını göstərir.

Mütəxəssislərin qeyd etdiyinə görə, Azərbaycanın müxtəlif bölgələrində paxlavanın fərqli növləri mövcuddur, hər ailə isə özünəməxsus reseptini qoruyub saxlayır. Hazırlanma prosesi bir neçə mərhələdən ibarətdir: qatların hazırlanması, bişirilməsi və şərbətlə isladılması.

Paxlava adətən mövsümi bayram zamanı hazırlanır, bu, yazın gəlişini qeyd etməklə yanaşı, mədəni ənənələrin möhkəmləndirilməsində də mühüm rol oynayır”, - materialda bildirilir.