İlon Maskın qızı atası haqqında: Pul insanı dəyişir, ən böyük qorxum budur

“Tesla” şirkətinin qurucusu İlon Maskın transgender qızı, 21 yaşlı Vivyen Cenna Uilson atası ilə münasibətlərini açıqlayıb.

Publika.az xəbər verir ki, o, bu barədə "Cosmopolitan" jurnalına verdiyi müsahibədə danışıb.

Vivyen bildirib ki, atasına qarşı olan gərgin münasibətlərlə artıq müəyyən qədər barışıb. Onun sözlərinə görə, bu vəziyyəti dəyişmək çox da mümkün deyil: “Bununla bağlı edə biləcəyim çox şey yoxdur. Bu, mənim hekayəmin bir hissəsidir, amma gələcəyim deyil”.

O, eyni zamanda imkanlı ailədə böyüməyin necə bir təcrübə olduğunu da bölüşüb. Vivyen bu həyatı “çox qəribə” və “izolyasiyaedici” kimi təsvir edib. Onun sözlərinə görə, elita öz daxilində qapanmış məktəblərə və sosial çevrələrə malikdir.

“Mən çox şeyi sonradan yenidən öyrəndim. Amma hələ uşaq olanda belə düşünürdüm ki, bu bir az bayağıdır. Kiçik yaşlarımda evsiz insanları görəndə çox pis olurdum. İnsanlar deyirdi ki, çox dramatizə edirəm, amma yox, mənim reaksiyam doğru idi”, - deyə o əlavə edib.

Vivyen zəngin bir ailədə böyüdüyünü etiraf edərək pulun insanlara necə təsir etdiyini öz gözləri ilə gördüyünü vurğulayıb: “Bəli, mən bunu öz gözlərimlə görmüşəm. Pul insanı dəyişir, hakimiyyətə meyl isə insanı daxildən korlayır”.

Onun fikrincə, uğur qazandıqdan sonra daha çoxunu istəmək sonsuz bir dövrə çevrilir: “Bu, sanki karikaturaya bənzəyir. Heç nə kifayət etmir, insan sanki ağlını itirir. Bu, səni başqa birinə çevirir və açığı, bu mənim ən böyük qorxularımdan biridir”.

Müəllif: Adəm