"Qiyamət" radiosundan müəmmalı hərbi mesaj: İndi hansı ölkə dağılacaq?

Dünyanın ən sirli radio dalğalarından biri hesab olunan və xalq arasında "Qiyamət günü" radiostansiyası kimi tanınan "UVB-76"dan yeni və həyəcanverici xəbər var.

Publika.az xəbər verir ki, uzun müddətdir yalnız monoton vızıltı səsi yayan stansiya qəfildən susaraq növbəti müəmmalı mesajını yayımlayıb.

"UVB-76 loqları" teleqram kanalının yaydığı məlumata görə, Bakı vaxtı ilə saat 13:46-da stansiyanın səsi kəsilib və efirdə bu kodlar səslənib: “NJTI 76418 NAYMOTAT 7491 2203”

Bu, stansiyanın son günlərdəki yeganə aktivliyi deyil. Belə ki, ötən bazar ertəsi günü də radiostansiya vasitəsilə dörd fərqli söz ötürülmüşdü: “lyusoştof”, “assambleya”, “kitayskiy” (çinli) və “erşistıy” (tikanlı).

Qeyd edək ki, onilliklərdir fəaliyyət göstərən bu stansiyanın dəqiq yeri və təyinatı rəsmən açıqlanmır. Lakin hərbi ekspertlər və sui-qəsd nəzəriyyəçiləri bu qısa mesajların hərbi əmrlər və ya xüsusi xidmət orqanlarına ötürülən gizli tapşırıqlar ola biləcəyini iddia edirlər. "Qiyamət günü" adı isə bu stansiyanın nüvə müharibəsi zamanı əlaqə vasitəsi kimi istifadə olunacağı ehtimalına görə verilib.

Müəllif: Adəm