Venesiyada inanılmaz hadisə: Nəhəng canlı kanalı bağladı, hərəkət dayandı

Venesiyada dünya mətbuatının diqqətini çəkən qeyri-adi hadisə baş verib. Şəhərin məşhur kanallarından birində çəkisi 1 tondan çox olan nəhəng Ay balığı (Mola mola) aşkar edilib. Sakka-Sessola adası yaxınlığında suyun üzündə hərəkətsiz qalan nəhəng balıq həm turistləri, həm də yerli sakinləri şoka salıb.

Publika.az xəbər verir ki, dəniz nəhəngini ilk olaraq su taksisinin sürücüsü görüb. Ölmüş balıq kanalda su nəqliyyatının ən intensiv hərəkət etdiyi marşrutu tamamilə bağlayıb. Nəticədə ərazidə qayıqların və gəmilərin hərəkəti bir neçə saatlıq iflic olub.

Hadisə yerinə dərhal xilasetmə xidmətləri cəlb edilib. Balığın gövdəsi o qədər ağır və böyük olub ki, onu sudan çıxarmaq üçün xüsusi kranlardan istifadə edilib. Bir neçə saat davam edən əməliyyatdan sonra kanal təmizlənib və hərəkət bərpa olunub.

Nəhəng canlı araşdırılması üçün Paduya Universitetinin mütəxəssislərinə təhvil verilib. Dəniz bioloqları okeanın dərin sularında yaşayan bu nadir canlının Venesiyanın dar kanallarına necə gəlib çıxdığını və ölüm səbəbini araşdırırlar. İlkin versiya kimi suyun temperaturunun dəyişməsi və ya ekoloji çirklənmə göstərilir.

Qeyd edək ki, Ay balıqları adətən sahildən uzaqda, açıq okean sularında yaşayırlar və onların sahilə bu qədər yaxınlaşması nadir hadisə hesab olunur.

Müəllif: Adəm