Əfsanə bitdi: Robin Qudun 1200 illik ağacı qurudu

Əfsanəvi Robin Qud haqqında miflərlə əlaqələndirilən, Şervud meşəsində yerləşən 1200 illik məşhur "Böyük Palıd"ın (Mayor Palıdı ) məhv olduğu rəsmən təsdiqlənib.

Publika.az xəbər verir ki, bu barədə "The Guardian" məlumat yayıb.

Bildirilib ki, ağac bu yaz yarpaq verməyib və bunu mütəxəssislər də təsdiqləyiblər. Məlumata görə, nəhəng palıdın məhv olmasının əsas səbəbi torpağın illərlə deqradasiyaya uğraması olub.

Qeyd olunur ki, dünyanın müxtəlif ölkələrindən gələn çoxsaylı turistlər ağacın ətrafındakı torpağı sıxlaşdırıb. Nəticədə yağış suları kök sisteminə keçə bilməyib, bu da ağacın qida və su ilə təminatını dayandırıb.

Qoruq nümayəndələri bu itkini “ürəkdağlayan” adlandırıblar. Maraqlıdır ki, əvvəlki illərdə də palıdın öldüyü barədə iddialar yayılmışdı, lakin təbiəti mühafizə təşkilatı bunu təkzib edərək ağacın yaşadığını bildirirdi.

Hazırda isə ağacın məhv olması faktı təsdiqlənib. Yaxın vaxtlarda mütəxəssislər qalıqları araşdıraraq vəziyyəti qiymətləndirəcəklər.

Müəllif: Adəm