İnsanlar və meymunlar eyni cür gülürlər: 15 milyon illik sirr açıldı

Böyük insanabənzər meymunların təxminən 15 milyon il əvvəl də insanlara bənzər ritmlə güldüyü müəyyən edilib.

Publika.az xəbər verir ki, bu nəticə Böyük Britaniyanın Uorik Universitetinin alimlərinin apardığı araşdırma zamanı ortaya çıxıb.

“Communications Biology” jurnalında dərc olunan tədqiqat çərçivəsində alimlər dörd növ insanabənzər meymunun - oranqutan, qorilla, bonobo və şimpanzelərin, eləcə də insanların gülüş səslərini müqayisə ediblər. Ümumilikdə 140 gülüş epizodu təhlil olunub.

Araşdırmanın nəticələrinə görə, bütün növlərdə gülüşün yaranması oxşar ritmik prinsiplə baş verir - səslər müəyyən fasilələrlə və nizamlı ardıcıllıqla formalaşır.

Tədqiqat müəllifləri hesab edirlər ki, bu xüsusiyyət insanla insanabənzər meymunların ortaq əcdadında formalaşıb və təxminən 15 milyon il ərzində ciddi dəyişiklik keçirməyib.

Bununla belə, alimlər insanlar və digər primatlar arasında mühüm fərqlərin də olduğunu bildiriblər. Belə ki, insan gülüşü daha sürətli, dəyişkən və vəziyyətə uyğun idarə oluna bilir. İnsanlar qeyri-iradi gülüşdən əlavə, nəzakət naminə və ya stres anlarında da şüurlu şəkildə gülə bilirlər.

Araşdırma müəlliflərinin fikrincə, məhz səs reaksiyalarına nəzarət qabiliyyətinin inkişafı insan nitqinin formalaşmasında əsas mərhələlərdən biri olub.

Alimlər hesab edirlər ki, gülüş dilin yaranmasından daha qədim vokal davranış olduğuna görə, onun öyrənilməsi insan nitqinin necə meydana gəldiyini anlamağa kömək edə bilər.

Müəllif: Adəm