Filmlərdə yox, gerçək həyatda: Bu ölkədə "Betmen” oğruları tutub dirəklərə bağlayır

Meksikanın Xalisko ştatında özünü xalq qisasçısı kimi aparan sirli şəxs peyda olub. Yerli sakinlər onu “Meksikalı Betmen” adlandırıblar.

Publika.az xəbər verir ki, bu barədə “The Sun” nəşri məlumat yayıb.

Xaliskonun Laqos-de-Moreno şəhərində küçələrdə işıq dirəklərinə "skoç"la bağlanmış kişilər tapılıb. Onların ağızları da skoçla bağlanıb, alınlarına isə “oğru” sözü yazılıb. Yanlarında isə iddialara görə, əvvəllər oğurladıqları əşyalar qoyulub.

Məlumata görə, “Meksikalı Betmen” cinayətkar hesab etdiyi şəxslərə qarşı fəaliyyətə iyunun ortalarından başlayıb. İki həftə ərzində o, beş nəfəri tutaraq dirəklərə bağlayıb.

Bildirilir ki, bəzi hallarda sirli qisasçı saxladığı şəxslərin üzünə markerlə pişik bığı da çəkib. Bu detal onun “imza üslubu” hesab olunur.

Polis isə hadisələrə fərqli yanaşır. Hüquq-mühafizə orqanlarının açıqlamasına görə, naməlum şəxs tərəfindən saxlanılanlar zərərçəkmiş hesab edilir və onlardan bəziləri ciddi şəkildə döyülüb.

Hazırda “Meksikalı Betmen” axtarışa verilib.

Müəllif: Adəm