Amazon cəngəlliyi altında inanılmaz sirr: 3 milyon insanın yaşadığı sivilizasiya üzə çıxdı

Braziliyanın Amazoniya bölgəsində arxeoloqlar təxminən 2,5 min il əvvəl mövcud olmuş sirli Akuiri sivilizasiyasına aid yüzlərlə naməlum qədim torpaq quruluşu aşkar ediblər.

Publika.az xəbər verir ki, bu barədə "Live Science" məlumat yayıb.

Kəşf tropik meşələrin sıx örtüyünün altını "görməyə" imkan verən lidar lazer skan texnologiyası sayəsində mümkün olub.

Təxminən 4,5 min kvadratkilometrlik ərazidə aparılan tədqiqat zamanı həndəsi formalı 396 yeni geoqlif - nəhəng torpaq tikilisi müəyyən edilib. Bununla da bu tip abidələrin məlum sayı 1700-ə çatıb. Alimlər hesab edirlər ki, Amazon cəngəlliklərində hələ 20 mindən çox belə tikili gizlənə bilər.

Tədqiqatçıların hesablamalarına görə, hər bir geoqlifin tikintisi və saxlanılması üçün təxminən 300 nəfər əmək sərf edib. Bu isə eramızın 100-300-cü illərində çiçəklənmə dövrünü yaşayan Akuiri sivilizasiyasının əhalisinin 1,25 milyondan 3 milyona qədər ola biləcəyini göstərir.

Mərasim mərkəzlərinin ətrafında çoxailəli uzun evlər yerləşib. Sakinlər qarğıdalı və balqabaq becəriblər. Alimlərin fikrincə, geoqliflər təkcə dini ayinlər üçün deyil, həm də ictimai toplantılar, siyasi qərarların qəbulu və icmalar arasında əlaqələrin möhkəmləndirilməsi məqsədilə istifadə olunub.

Araşdırma müəllifləri bildirirlər ki, bu tikililər Perudakı məşhur Naska xətləri ilə oxşarlıq göstərsə də, bu iki mədəniyyət arasında əlaqə olmayıb. Onları birləşdirən əsas cəhət nəhəng quruluşların miqyasının yalnız havadan tam görünməsidir.

Alimləri düşündürən əsas suallardan biri isə Akuiri sivilizasiyasının necə yoxa çıxmasıdır. Məlumata görə, eramızın 850-950-ci illəri arasında geoqliflər qəfil tərk edilib. Bunun səbəbi hələ müəyyən edilməyib. Tədqiqatçılar hesab edirlər ki, Akuirinin süqutu həmin dövrdə Maya, Tiuanako və Uari kimi Amerika sivilizasiyalarını da əhatə edən genişmiqyaslı böhranın bir hissəsi ola bilər.

Müəllif: Adəm Abbaslı