Dua edən it, kəkilli buzov, uçan at... - FOTO

2026-cı il Beynəlxalq Ev Heyvanları Fotoqrafiyası Mükafatlarının qalibləri açıqlanıb.

Publika.az xəbər verir ki, dünyanın müxtəlif ölkələrindən təqdim edilən minlərlə foto arasında heyvanların ən maraqlı, emosional və qeyri-adi anlarını əks etdirən kadrlar seçilib.

Builki müsabiqədə avstraliyalı fotoqraf Kalli Soden əsas mükafata layiq görülüb. Onun “Möhtəşəm lütf” adlı fotosu Beynəlxalq İlin Ev Heyvanları Fotoqrafı seçilib. Soden eyni zamanda “Yaradıcılıq” və “Studiya” kateqoriyalarında da qalib olub.

2019-cu ildə avstraliyalı fotoqraflar Şarlotta Rivz və Kreyq Terner-Bullok tərəfindən yaradılan müsabiqə qısa müddətdə dünyanın ən nüfuzlu ev heyvanları fotoqrafiyası yarışlarından birinə çevrilib.

2026-cı il yarışına 48 ölkədən fotoqraflar tərəfindən 4200-dən çox foto təqdim olunub. 27 nəfərlik münsif heyəti qalibləri 12 müxtəlif kateqoriya üzrə müəyyənləşdirib.

Müsabiqədə it və pişik portretlərindən tutmuş at, quş, dovşan və hətta inək fotolarına qədər müxtəlif heyvanların qeyri-adi görüntüləri yer alıb. İlk dəfə bu il “Sifarişli portfolio”, “Kamera daxili sənət”, “Telefon” və “Studiya” kimi yeni kateqoriyalar da əlavə edilib.

“Fəaliyyət” kateqoriyasında Linda Qlomb xilasedici iti Şnuffinin enerjili görüntüləri ilə qalib olub. Mark Vandeyk təbiətdə çəkdiyi it fotolarına görə “İt portreti” kateqoriyasında birinci yeri tutub.

Pişiklər arasında isə Belinda Riçards dostunun “Mooşa” adlı pişiyinin müxtəlif ifadələrini əks etdirən yaradıcı fotoları ilə qalib seçilib. Riçards bildirib ki, pişiyin fərqli mimikaları onun bütün xarakterini göstərən xüsusi bir layihəyə çevrilib.

Müsabiqədə atlar, bayquşlar, quzular və digər heyvanların da yer aldığı emosional fotolar diqqət çəkib. Təşkilatçılar bildiriblər ki, bu layihənin məqsədi heyvanlara qarşı sevgi və hörməti artırmaq, onların insanlarla münasibətindəki xüsusi bağları göstərməkdir.

Qalib fotolar arasında havaya sıçrayan itlər, heykəl kimi poz verən pişiklər və təbiətdə çəkilmiş təsirli heyvan portretləri yer alıb. (“Qafqazinfo” )