95 illik sirr: Hitler bacısı qızını özü güllələyib? - Tarixçi sensasion iddia irəli sürdü

95 il əvvəl Almaniyanın Münhen şəhərində ölən Adolf Hitlerin bacısı qızı Geli Raubala ilə bağlı yeni iddia ortaya çıxıb.

Publika.az xəbər verir ki, uzun illər 23 yaşlı Geli Raubalın özünü güllələyərək intihar etdiyi hesab olunub. Lakin alman tarixçisi Harald Sandner Hitlerin həmin vaxt Münhendə ola və ölümcül gülləni məhz onun açmış ola biləcəyini iddia edir.

Rəsmi versiyaya görə, Geli 19 sentyabr 1931-ci ildə Hitlerin Münhendəki mənzilində ölü tapılıb. Həmin vaxt Hitler bir gün əvvəl Nürnberqə getdiyi üçün hadisə zamanı şəhərdə olmadığı bildirilirdi. Polis isə yarılma aparmadan ölümü intihar kimi qiymətləndirib.

Sandnerin sözlərinə görə, onun əldə etdiyi ölüm haqqında şəhadətnamə Geli Raubalın cəsədinin rəsmi tarixdən təxminən 24 saat əvvəl aşkarlandığını göstərir. Tarixçi hesab edir ki, bu halda ölüm ya sentyabrın 18-də səhər saatlarında, ya da əvvəlki gecə baş verib və bu, Hitlerin Nürnberqdə olması ilə bağlı rəsmi xronologiyanı şübhə altına alır.

Tarixçi həmçinin Münhen polisinin Hitlerin adı hallanan hadisənin əsl hallarını gizlətmək üçün onunla sövdələşmiş ola biləcəyini irəli sürüb. Bununla belə, bu iddialar yeni tarixi şərhdir və Hitlerin Geli Raubalın ölümündə birbaşa iştirakını təsdiqləyən qəti sübut təqdim edilmir.

Geli Raubalın Hitlerlə münasibətləri də uzun illər mübahisə mövzusu olub. O, 17 yaşından etibarən Hitlerlə birlikdə yaşayıb və onun ciddi nəzarəti altında olub. Hitler Geli ilə münasibət quran şəxslərə də qarşı çıxıb. Məsələn, onun şoferi Emil Morislə münasibətini öyrəndikdən sonra Geliyə əlaqəni kəsməyi əmr edib, Morisi isə işdən çıxarıb.

Müəllif: Adəm Abbaslı