Qaraqalpaqıstanda fövqəladə vəziyyət elan edildi

Özbəkistan prezidenti Şavkat Mirziyoyev kütləvi etirazlarla əlaqədar Qaraqalpaqıstanda fövqəladə vəziyyət elan edib.

Publika.az xəbər verir ki, bu barədə prezidentin mətbuat katibi Şerzod Əsədov məlumat yayıb.

O qeyd edib ki, Özbəkistan prezidentinin fərmanı ilə 2022-ci il iyulun 3-dən avqustun 2-dək Qaraqalpaqıstan ərazisində fövqəladə vəziyyət rejimi tətbiq edilib.

Onun sözlərinə görə, belə bir qərarın qəbul edilməsində əsas məqsəd vətəndaşların təhlükəsizliyinin təmin edilməsi, onların hüquq və azadlıqlarının qorunması, asayişin bərpasıdır.

Xatırladaq ki, bu gün məlum olub ki , Qaraqalpaqıstan (Özbəkistan) muxtar respublikasında statusunu dəyişdirəcək konstitusiya islahatına qarşı nadir ictimai etiraz aksiyası keçirilib.

Hazırkı konstitusiyada bu bölgənin öz suverenliyi və referendumla ayrılmaq hüququ var. Yeniliklər Qaraqalpaqstanın suverenliyini və öz müqəddəratını təyinetmə hüququnu ləğv etməyi təklif edirdi.

Prezident Mirziyoyev daha sonra Qaraqalpaqıstanda etirazlara səbəb olan konstitusiya dəyişikliklərinin ləğvini təklif edib.

Hüseyn İbadlı