Gərginlik pik həddə - Ukrayna Belarusa xəbərdarlıq etdi: Faciəvi səhvlərə yol verməyin

Ukrayna Xarici İşlər Nazirliyi Minski qüvvələrini sərhəddən daha da uzaqlaşdırmağa çağırıb.

Publika.az xəbər verir ki, Kiyev bəyan edib ki, Belarus təlimlər adı altında xeyli sayda hərbi qulluqçu, o cümlədən Xüsusi Əməliyyat Qüvvələri və texnika, o cümlədən tanklar, artilleriya, reaktiv yaylım atəş sistemləri (MLRS) və hava hücumundan müdafiə sistemləri ilə Ukrayna ilə sərhəd olan Qomel vilayətində cəmləşib.

“Biz Belarus rəsmilərini faciəvi səhvlərə yol verməməyə (...) və qoşunları sərhədimizdən çıxarmağa çağırırıq”, - Ukrayna Xarici İşlər Nazirliyinin müraciətində deyilir.

Xarici İşlər Nazirliyi qeyd edib ki, Belarus təlimləri Çernobıl Atom Elektrik Stansiyasının yaxınlığında keçirilir. Departament "dost olmayan hərəkətləri dayandırmağa və qoşunları Ukraynanın dövlət sərhədindən Belarusda mövcud olan atəş sistemlərinin atəş məsafəsindən artıq məsafəyə çıxarmağa" çağırıb.

Kiyev vurğulayıb ki, dövlət sərhədinin pozulması halında respublika özünümüdafiə üçün bütün lazımi tədbirləri görəcək, eyni zamanda Belarus ərazisində bütün qoşunların cəmləşməsi, hərbi obyektlər və təchizat yolları qanuni hərbi hədəfə çevriləcək.

Avqustun 18-də Belarusun Ukrayna istiqamətində qoşun qruplaşmalarını gücləndirdiyi bildirilir. Ölkənin Hərbi Hava Qüvvələri və Hava Hücumundan Müdafiə Qüvvələrinin komandanı Andrey Lukyanoviç bunun Ukrayna pilotsuz təyyarələrinin Belarus hava məkanını pozması ilə bağlı insidentdən sonra baş verdiyinə aydınlıq gətirib.

“Cənubda nəhəng qrup yaradılıb, kəşfiyyat məlumatları da toplanır. (...) Təsdiq edirik ki, Silahlı Qüvvələrin bölmələrinə döyüş əmrləri daxil olub və qrup artıq gücləndirilib. Bu, aviasiya, zenit-raket qüvvələri və radiotexnika qoşunlarına aiddir”, - Lukyanoviç deyib.

Tural