Şimali Qafqazda İNTİQAM ATƏŞİ ALOVLANIR - Melikov milyarder Kərimova dəstək vəd etdi

Dağıstanın rəhbəri Sergey Melikov Çeçenistan lideri Ramzan Kadırovun qan davası ilə bağlı açıqlamalarından sonra milyarder senator Süleyman Kərimova dəstək vəd edib.

Publika.az xəbər verir ki, müvafiq mesaj Dağıstanlı siyasətçinin Telegram-kanalında dərc olunub.

"Dağıstan çətin anlarda Süleyman Kərimovu həmişə dəstəkləyəcək", - Melikov yazıb.

Dağıstanın lideri Mahaçqalada parkın yenidən qurulmasına görə milyarderə təşəkkürünü bildirib və əlavə edib ki, onun əməlləri “həmişə ürəkdən gəlir”.

Xatırladaq ki, oktyabrın 10-da Çeçenistan Respublikasının başçısı Ramzan Kadırov dağıstanlı deputat Süleyman Kərimov və Dövlət Dumasının deputatları Rizvan Kurbanov və Bexan Baraxoyevə Çeçenistan rəhbərinə qarşı sui-qəsd planlaşdırmadıqlarını sübut edə bilməyəcəkləri təqdirdə qan davası elan edib.

Kadırov "Wildberries"in Moskva ofisi yaxınlığında baş verən atışma barədə belə danışıb. O hesab edir ki, guya siyasətçilər hazırkı “işgüzar vəziyyət”ə görə onun qətlini sifariş veriblər. Kadırov bildirib ki, sərəncamın şahidləri və hətta sui-qəsdin hazırlanması üçün ayrılan məbləğ barədə məlumatı var.

Hüseyn İbadlı