Mərcili börək

Mərci zülallarla zəngin qidalardan biridir. Diyetoloqlar əti əvəz edəcək tək qidanın mərci ola biləcəyini bildirirlər. Üstəlik, bizim tez-tez şorba bişirdiyimiz qırmızı mərcini deyil, yaşıl mərcini tövsiyə edirlər. Elə isə vaxt itirmədən Publika.az-ın təqdim etdiyi yaşıl mərcili börək reseptini sınaqdan keçirin:

Tərkibi:

4 ədəd yuxa

1 stəkan suda bişirilmiş yaşıl mərci

1 armudu stəkan zeytun yağı

1 ədəd soğan

1 diş sarımsaq

Yarım xörək qaşığı bibər pastası

2 stəkan su

1 çay qaşığı zirə

Zövqə görə duz, istiot və pul bibər

Üzərini bəzəmək üçün: qara çörək otu və küncüt

Hazırlanması:

Soğan və sarımsağın qabığını soyub kub formasında doğrayın. Tavaya 1 xörək qaşığı maye yağ töküb qızdırın. Sarımsaqla soğanı qızardın.

5 dəqiqə sonra mərcini, bibər pastasını, ədviyyatları, duzu və 1 stəkan suyu əlavə edib qarışdırın.

Suyu çəkilənə qədər içliyi bişirməyə davam edin.

Daha sonra ocağı söndürüb içliyin soyumasını gözləyin.

Bir kasanın içərisində qalan zeytun yağı ilə suyu qarışdırın.

Yuxanı mətbəx stoluna sərib üzərinə su və zeytun yağından ibarət qarışığı çəkin.

İkinci yuxanı onun üstünə qoyub üç barmaq qalınlığında uzun hissələr kəsin.

Kəsdiyiniz yuxalardan birini götürüb bir ucuna 1 xörək qaşığı mərcili içlikdən qoyun. Onu üçbucaq formasında qatlayın. Digər yuxaları da eyni qayda ilə hazırlayın. Börəkləri yağladığınız soba qabına düzün. Üzərinə çörəkotu və küncüt səpib 180 dərəcəyə qoyulmuş sobada 20 dəqiqə bişirin.

Nuş olsun!

Ləman Sultan