Novruz süfrəsi üçün dadlı şəkərbura

Bu gün od çərşənbəsidir. Evlərdə axşam süfrəsinə qoyulacaq milli yemək və şirniyyatların hazırlanmasına başlanıb. Novruz süfrəsini şəkərburasız təsəvvür etmək mümkün deyil. Bəs bu dadlı şirniyyat necə hazırlanmalıdır?

Publika.az-ın təqdim etdiyi reseptlə hazırlanan şəkərburanın dadından doymayacaqsınız.

Tərkibi:

Xәmiri üçün:

1 kq. un

3 ədəd yumurta

250 qr. kәrә yağı

1 stəkan süd

2 xörək qaşığı xama

Yarım çay qaşığı duru maya

İçlik üçün:

500 qr. fındıq lәpәsi

500 qr. şәkәr tozu

1/4 çay qaşığı hil

Hazırlanması:

Əvvəlcə xәmiri hazırlamaq lazımdır. Südü qaba töküb ocağın üzərinə qoyun, ilıqlaşanda ocaqdan götürün. Sonra yağı әridin. Mayanı ilıq südə töküb 5-­10 dәqiqә qarışdırın. Maya köpüklәnəcək. Unu iri bir qaba töküb ortasında boşluq yaradın. Yumurtanı, mayanı, südü, yağı vә xamanı əlavə edib xәmir yoğurun. Xәmirin üstünә salafan çәkib, 1 saat acımağa qoyun.

İndi sıra içlikdədir. Fındığı tavada qovurub qabığını tәmizlәyin, daha sonra maşından keçirin. Çәkilmiş fındığı şәkәr tozu vә hil ilә qarışdırın.

Acımış xәmirdәn 40 kündә düzәldin. Hər kündə qozdan bir az böyük olmalıdır.

Kündәnin birini götürüb oxlov ilә diametri təxminən 10 santimetr olan yuxa yayın. İçərisinə 2 çay qaşığı içlik qoyub yanlarını bәrkidin. İstəsəniz, kənarlara fərqli formalar verə bilər və ya adi qaydada bükə bilərsiniz. Üzünә naxış salın. Bu üsulla bütün şəkərburaları hazırlayıb bişirәcәyimiz qaba yığın. 170-­180 dәrәcәdə qızdırılmış sobada 20­-25 dәqiqә bişirin.

Bişmiş şәkәrburaları sәrin yerdә saxlayın. Üstünü örtmәyin.

2-3 saat keçdikdən sonra şәkәrburaları qazana yığıb ağzını örtün. Şәkәrburanı uzun müddәt saxlamaq istәyirsinizsә, bu qaydaya mütləq əməl edin. Salafana ya da soyuducuya qoysanız, tez xarab olacaq.

Nuş olsun!