İsa Qəmbər araya girdi, Vurğun Əyyubla Arif Hacılı razılaşdı – Seçki gedişi

Azərbaycan Demokratiya və Rifah (ADR) hərəkatının sədr müavini Vurğun Əyyubun noyabrın 1-də Milli Məclisə keçiriləcək seçkilərdə deputatlığa namizədliyi qeydə alınıb.

Publika.az xəbər verir ki, 30 saylı Suraxanı birinci seçki dairəsindən bitərəf olaraq namizədliyini irəli sürən V. Əyyub YAP-ın namizədi Sevinc Fətəliyeva ilə mübarizə aparmalı olacaq. S. Fətəliyevanın da namizədliyi rəsmən qeydə alınıb.

Maraqlıdır ki, Müsavat Partiyası VIII qurultayından sonra əsas rəqibləri sırasına daxil olan V. Əyyuba qarşı rəqib irəli sürməyib. Belə ki, partiyanın bu dairədən namizədi yoxdur. Eyni rayon üzrə yerləşən ikinci seçki dairəsindən isə partiya başqanı Arif Hacılının qardaşı Mustafa Hacıbəylinin namizədliyini irəli sürüb.

ADR-dəki mənbələrdən əldə etdiyimiz məlumata görə, V. Əyyuba qarşı namizədin irəli sürülməməsi haqda tərəflər arasında razılıq əldə olunub. Belə ki, hakim partiyanın V. Əyyubun qeydə alındığı dairə üzrə namizədi güclüdür və buna görə Müsavat həmin dairədən namizəd irəli sürməklə səsləri bölmək istəməyib. Razılıq prosesinin əsas memarının İsa Qəmbər olduğu deyilir.

Məsələ ilə bağlı V. Əyyubun münasibətini öyrənə bilməsək də, mənbə ADR ilə Müsavat arasında budəfəki seçkilərlə bağlı ümumi razılığın olduğunu bildirib.

“ADR bu seçkilərdə namizədlər çıxış etməyib. Sadəcə olaraq, V. Əyyubun bitərəf namizəd olması qərarı verilib. Müsavatın namizədlərinə qarşı namizəd irəli sürməyən ADR də onların V. Əyyuba qarşı çıxmamasını istəyib. Beləliklə, razılıq əldə olunub”, - deyə məlumatda qeyd olunur.

Asif Nərimanlı