Cibimizdə eşələnən əl: Azərbaycana qarşı hücumların pərdəarxası

ABŞ-da konqresmen Kris Smit Azərbaycana qarşı sanksiyaların tətbiq edilməsi üçün qanun layihəsi ilə çıxış edib. Nə təsadüf ki, eyni ərəfədə Avropa Şurasının baş katibi Torbyörn Yaqland Azərbaycanın Avropa İnsan Haqları Konvensiyasını necə yerinə yetirməsi üzrə rəsmi araşdırmaya başlayıb. Hər iki işdə Azərbaycan “söz azadlığı” silahı ilə vurulur və ölkədə demokratiyanın pozulduğu iddia olunur.

Demokratiya, ABŞ İraqa bu ad altında girmişdi, indi Yaxın Şərqdə yaşananların da kökündə məhz bu faktor dayanır. Amma söhbət insanların azadlığından, azad ifadədən getmir, əsas məsələ maraqlardır.

“Demokratiya başqa insanların cibinizdə eşələndiyi zaman başınızın üstündə asılan və sizi yuxarı zillənməyə məcbur edən bir hava şarıdır”.

Məşhur britaniyalı Bernard Şounun bu bənzətməsi günümüzdə olduqca aktualdır.

Qərb bir əlini cibimizə salıb eşələyir, o biri ilə “demokratiya şarını” başımızın üstündə tutur. Daxili işlərimizə müdaxilə edir, bunu demokratiyaya calayır, taleyimizi necə müəyyənləşdirmək hüququmuza qarşı çıxır, yenə demokratiya deyir. Bu məlum məsələdir.

Lakin Azərbaycana qarşı ABŞ və Avropadan eyni vaxtda hücumun başlaması diqqət çəkir.

Vaşinqtonda müəyyən dairələrin anti-Azərbaycan fəaliyyəti təəccüblü deyil. Son iki ildə biz bunun konkret addımlarını gördük. Məqsəd rəsmi Bakının müstəqil siyasi kurs aparması, ABŞ-ın regionda, eləcə də Avrasiyadakı maraqlarına deyil, Azərbaycan xalqının maraqlarına xidmət etməsidir. Misal üçün, ABŞ, daha dəqiq desək, bu ölkədəki müəyyən siyasi dairələr həmişə Azərbaycanın öz qonşuları Rusiyaya, yaxud İrana qarşı çıxmasını istəyir. Yəni, doğru, yaxud yanlış olmasından asılı olmayaraq, onlarla eyni səfdə addımlamasını istəyir. Bu, məsələnin siyasi tərəfidir. Bununla yanaşı, Azərbaycana qarşı hücumların arxasında erməni faktorunun dayandığı da bəllidir. Kris Smitin konqresmen seçildiyi Nyu-Cersi ştatında ermənilərin sayının çox olması və onunla müəyyən əlaqələrə malik olması da bu amili təsdiqləyir.

Avropaya, daha dəqiq desək, Yaqlanda gəlincə, onun da ermənilərlə isti əlaqələri artıq sübut olunub. Onun məhz indi Azərbaycanla bağlı araşdırmalara başlaması da təsadüfi deyil.

AŞPA-nın son sessiyasında Azərbaycan Ermənistan üzərindən böyük diplomatik uğur qazandı. Belə ki, Britaniyadan olan deputat Robert Uolterin “Azərbaycanın Dağlıq Qarabağ və işğal edilmiş digər ərazilərində zorakılığın artması” adlı qətnamə layihəsi, Bosniya və Herseqovinadan olan deputat Militsa Markoviçin isə “Azərbaycanın sərhədyanı regionlarının əhalisi qəsdən içməli sudan məhrum edilirlər” adlı hesabatı açıqlandı. 2016-cı ilin 26 yanvar tarixində AŞPA-nın Strasburqda keçiriləcək qış sessiyasında hər iki məsələ yenidən müzakirəyə çıxarılacaq.
R. Uolterin qətnamə layihəsinin müzakirəsindən sonra AŞPA-dakı Ermənistan nümayəndə heyətinə sanksiyaların tətbiq edilməsi də nəzərdə tutulur. Bu, faktiki olaraq Ermənistanın işğalçılıq siyasətinin iflası deməkdir. Həmin hesabatlardan sonra İrəvanda yaşanan siyasi xaos da bunu sübut etdi.

Həmin qətnamədən sonra Ermənistan parlamentinin iclasında spiker Qalust Saakyan AŞ PA-nın qış sessiyasında qətnamənin qəbulunun qarşısını almaq üçün səfərbər olmağa çağırdı.

“Biz hələ bir il əvvəl bu sənəd haqda məlumat almışdıq və müxtəlif nümayəndə heyətləri ilə təmaslarımızda məsələni qaldırırdıq”, - deyə o bildirib.

Ermənistan prezidenti Serj Sarkisyan da AŞPA-dakı məğlubiyyətin qarşısını almaq üçün bütün vasitələrdən istifadə etmək tapşırığı vermişdi.
Gələn ay Ermənistanı AŞPA-da gözləyən təhlükə fonunda Yaqlandın Azərbaycanla bağlı araşdırmalara başlaması təsadüfdürmü?! Bu kontekstdə iddia etmək mümkündür ki, T. Yaqland məhz Ermənistanı qorumaq üçün indidən Azərbaycana qarşı hücumlara başlayıb.

Asif Nərimanlı