Bakı Suriya probleminin həlli üçün dialoq meydançası ola bilər

“Bu yaxınlarda İrana səfər edən Prezident İlham Əliyevin diplomatik fəallığı diqqəti cəlb etdi. Eyni zamanda, Rusiya prezidenti Vladimir Putinin və İran prezidenti Həsən Ruhaninin Azərbaycan lideri ilə telefon danışıqlar ortada əhəmiyyətli məsələlərin olduğuna dəlalət edir”.

Publika.az xəbər verir ki, bu barədə Milli Məclisin deputatı, politoloq Rasim Musabəyov deyib.

Politoloq qeyd edib ki, rəsmi məlumatlarda ikitərəfli münasibətlərdən bəhs edilir və danışıqların detalları açıqlanmır: “Lakin söhbət Rusiya, Azərbaycan və İranın iştirakı ilə üçtərəfli əməkdaşlıqdan gedir. Genişmiqyaslı layihələr sırasında Şimal-Cənub dəmiryolu dəhlizinin qısa müddətdə tamamlanması, həmçinin, üç ölkənin elektrik enerjisi xətlərinin birləşdirilməsi də daxildir”.

R. Musabəyov bildirib ki, üçtərəfli müzakirələrdə həmçinin Suriya məsələsi gündəmə gətirilə bilər.

“Azərbaycan Türkiyə və Qərblə yanaşı, Rusiya və İranla da Suriyadakı humanitar problemin həllində yaxından iştirak etmək niyyətindədir. Bakı Suriya münaqişəsinin nizama salınmasında dialoq meydançası ola bilər”, - deyə politoloq vurğulayıb.

Asif Nərimanlı