“İncirlik” tapmacası, İŞİD-in kabusu olan “div”, Qarabağ mərci... – GÜNÜN SİYASİ XÜLASƏSİ

Türkiyə xarici işlər naziri Mövlud Çavuşoğlunun "İncirlik" bəyanatı və ardınca gələn təkzibi günə damğasını vurdu. Rusiyalı şair, publisist Aleksandr Fomenkovun "facebook" səhifəsində "Azərbaycan payızda ərazi bütövlüyünü bərpa edəcək" deyərək mərc etməsi də maraqla qarşılandı.

Rusiya "İncirlik"də?

Türkiyə "İncirlik" hərbi bazasını Rusiyanın istifadəsinə verməyə hazırdır. Bunu Türkiyənin xarici işlər naziri Mövlud Çavuşoğlu TRT kanalına müsahibəsində Soçidə rusiyalı həmkarı Segey Lavrovla apardığı danışıqların detalları barədə danışarkən deyib.

"Türkiyə və Rusiya İŞİD-ə qarşı mübarizə məsələsində əməkdaşlığa hazırdır. Ona görə də Türkiyə İŞİD-ə qarşı əməliyyatlarda Rusiyanın "İncirlik" hərbi bazasından istifadəsinə icazə verməyə hazırdır", - Çavuşoğlu bildirib.

Amma üstündən saatlar keçəndən sonra Mövlud Çavuşoğlu "İncirlik" bazasından Rusiyanın istifadəsi ilə bağlı sözlərini təkzib edib.Çavuşoğlu baş nazir Binəli Yıldırımla birlikdə keçirdiyi mətbuat konfransında sözlərinin səhv başa düşüldüyünü bildirib.

"Mənim belə bir ifadəm olmayıb. Bildirdim ki, İŞİD-lə mübarizədə Rusiya ilə əməkdaşlıq edə bilərik. Mən "İncirlik" bazasından Rusiyanın istifadəsi haqqında hər hansı bəyanat verməmişəm", - Türkiyə xarici siyasət idarəsinin başçısı deyib.

İstanbulda Azərbaycan vətəndaşına qarşı "ZÜMRÜD ƏMƏLIYYATI"

İstanbulun Polis İdarəsi və Qaçaqmalçılığa qarşı mübarizə şöbəsinin qrupları Sabiha Gökçen hava limanında "zümrüd əməliyyatı" keçirib. Əməliyyat zamanı çay paketlərində 5,5 kiloqram zümrüdü Dubaydan Türkiyə ərazisinə keçirməyə çalışan Azərbaycan vətəndaşı saxlanılıb. Ekspertlər bildirilər ki, üzərində işlənəcəyi halda qiymətli daşların bazar dəyəri 3 milyonu keçəcək. Azərbaycan vətəndaşının adı açıqlanmayıb.

İranlı "div" İŞİD-ə qarşı döyüşəcək

İranlı "div olaraq tanınan idmançı Sajad Qəribi İŞİD-lə döyüşmək üçün könüllü olaraq İran ordusuna qatılacaq. İdmançı bu haqda "Instagram" hesabında yazıb. Çəkisi 155 kiloqram olan idmançı İŞİD-ə qarşı döyüşmək üçün Suriyaya gedəcəyini söyləyib.

Corc Sorosun ermənilərlə gizli əlaqələri üzə çıxdı

Rəngli inqilabların sponsoru kimi tanınan Corc Sorosun erməniləri gizli şəkildə maliyyələşdirdiyinə dair informasiyalar yayılıb. Sorosun Türkiyədə maliyyələşdirdiyi layihələrin siyahısı üzə çıxıb.

Məlumata görə, təkcə 2015-ci ildə Soros Fondu bu təşkilatlara 18 milyon lirə maliyyə ayırıb. Siyahıda Türkiyədə fəaliyyət göstərən erməni mərkəzinə maliyyə ötürüldüyü də qeyd olunur. Siyahıta 10 təşkilatın adı yer alıb.

Azərbaycan payızda ərazi bütövlüyünü bərpa edəcək – DƏQİQ VAXT

"Bu ilin payızında Azərbaycan öz ərazi bütövlüyünü bərpa edəcək". Bu barədə rusiyalı şair, publisist Aleksandr Fomenkov "facebook" səhifəsində yazıb. O, bundan qəti şəkildə əmin olduğunu dilə gətirib. Famenkov qeyd edib ki, əgər o haqlı çıxmasa, bütün şeirlərini, hekayələrini, məqalələrini və esselərini yandıracaq: "Və ömrümün sonuna qədər Azərbaycan sözünü dilimə gətirməyəcəm".

Baş nazir göstəriş verdi: "Hamını təcili edam edin!"

İraqın baş naziri Haydar Abadi ölkədə terrorçular barəsində verilən ölüm hökmlərinin təcili icrası barədə göstəriş verib. Baş nazir bu göstərişi ötən bazar günü Bağdadda həyata keçirilən silsilə terror aktlarından sonra verib. Partlayışlarda ən azı 213 nəfər ölüb, 200-dən çoxu yaralanıb.

Ömər Dağlı