Eldəniz Quliyev: “Eldar Namazovla aramı vurmaq istəyirlər”

“Eldar Namazovla mənim aramı vurmağa çalışırlar”.

“El” hərəkatının üzvü Eldəniz Quliyev Publika.az-a açıqlamasında E. Namazovun onun məhkəməsində iştirak etməməsi haqda yayılan xəbərlərə münasibət bildirərkən deyib.

Onun sözlərinə görə, E. Namazov həmin vaxt xaricdə olub: “Sonra da bəyanat verib. Eldar neynəməli idi ki? Mətbuatda bunu şişirdirlər, sensasiya düzəldirlər. Amma belə deyil”.

E. Quliyev qeyd edib ki, onu müxalifətin aparıcı partiyaları dəstəkləyib.

“Həm siyasi partiya rəhbərləri, həm ölkədə və xaricdə olan soydaşlarımız kifayət qədər dəstək göstərdi. Bunu dansam, haqsız olaram. “El”in də bəzi üzvləri məhkəmədə iştirak edirdi. Sadəcə Eldar Namazov ölkədə yox idi. Amma məhkəmə zalında heç yer yox idi oturmağa. Mən müdafiəmdən şikayətçi deyiləm. Siyasi partiyalardan AXCP dəstək verdi, Əli Kərimli və Cəmil Həsənli məhkəmədə iştirak edirdi. Əli Kərimli bütün vasitələrdən istifadə edib məni müdafiə etdi. Müsavat üzvləri də orda idi. Müsavat başqanı İsa Qəmbər bəyanat verdi, Arif Hacılı dəfələrlə zəng etdi. Lalə Şövkət dəstək bəyanatı verdi”, - deyə o bildirib.

E. Quliyev əlavə edib ki, uman yerdən küsərlər.

“Bu prosesdə Əli Kərimli qabağa düşdü. Amma mən çox istəyərdim ki, bu funksiyanı “El” hərəkatı öz üzərinə götürsün. Çünki hər-halda mən “El”in təmsilçisiyəm”, - deyə o bildirib.

Asif Nərimanlı