“İndiki Müsavata qaragüruhçular lazımdır”- Şok açıqlama

“Əhliman Abbas və onunla birlikdə istefa verən gənclər hazırkı Müsavat Partiyasına lazım deyil. Çünki hazırkı partiya hay-küyçü, qaragüruhçu insanlara daha çox üstünlük verir”.

Bu barədə Publika.az-a açıqlamasında Müsavat başqanlığına keçmiş namizəd Səxavət Əlisoy MGT-nin sədri Ə. Abbasın, eləcə də digər gənclərin istefasına münasibət bildirərkən deyib.

S. Əlisoy istefa verən gəncləri yaxşı anladığını deyib. Bildirib ki, o gənclər üçün başqa seçim imkanı buraxmırlar: “Gedənlərin də arxasınca min cür fikirlər səsləndirirlər. Hansı ki, bu gənclər onların arxasınca danışanlara səmimi şəkildə inanıb bu partiyaya üz tutublar. Mübarizəyə ürəklə qoşulublar. Amma vəziyyət elə gətirdi ki, hər kəsin iç üzü ortaya çıxdı və partiyada dözülməz vəziyyət yarandı. Biz illərdir siyasətin içindəyik və bəzi şeylər bizim üçün adi gəlir, çünki zaman-zaman belə şeylərlə rastlaşmışıq. Amma bu gənclər siyasətə, mübarizəyə yeni qatılıblar və hansısa qeyri-səmimi davranış onlara pis təsir edir. Mən Əhliman Abbasın istefa səbəblərinə haqq qazandırıram”.

S. Əlisoy Arif Hacılını da tənqid edib. Bildirib ki, yeni başqan partiya üçün böyük başağırısı və itki oldu.

“Mən onu istefaya çağırmışdım və bu çağırış hələ də gündəmdə qalır. Amma inanmıram ki, Arif Hacılı və onun qrupu əllərindəkini buraxsınlar”, - deyə S. Əlisoy bildirib.

Asif