İşğal olunmuş torpaqlarla bağlı qanun qəbul edilməsi təklif olunur

Dağlıq Qarabağ regionunda və digər ərazilərdə zorakı məskunlaşdırma və digər qanunsuz fəaliyyət haqqında ayrı-ayrı ölkələrin parlamentarilərinə məktub göndərilməsi təklif edilib.

Publika.az xəbər verir ki, bu təkliflə Milli Məclisin bu gün keçirilən plenar iclasında deputat Musa Qasımlı çıxış edib.

“Biz bu payız sessiyası dövründə Ermənistanın Azərbaycana qarşı təcavüzünün nəticələri, işğal edilmiş Dağlıq Qarabağ regionunda və digər ərazilərdə zorakı məskunlaşdırma və digər qanunsuz fəaliyyət haqqında həm beynəlxalq parlament təşkilatlarına, həm də ayrı-ayrı ölkələrinin parlamentləri ilə dostluq qruplarının üzvlərinə fərdi olaraq məktublar göndərək və xahiş edək ki, onlar bu məsələni öz parlamentlərində qaldırsınlar. Ermənilər 2015-ci ildə tarixdə heç zaman olmayan qondarma “soyqrımı”n 100 illiyini qeyd etməyə hazırlaşır. Biz də bundan istifadə edərək öz həqiqətlərimizi dünya ictimaiyyətinə çatdırmalıyıq. Fikrimcə, 2015-ci ildə Xocalı soyqırımı ilə bağlı həqiqətlərin dünya ictimaiyyətinə çatdırılmasında Milli Məclis daha yüksək fəallıq göstərə bilər. Bunun bizə böyük faydası olar”, -deyə deputat bildirib.

Deputat Qənirə Paşayeva isə çıxışında işğal olunmuş Azərbaycan əraziləri ilə bağlı qanunun qəbul edilməsini təklif edib.

Millət vəkili belə bir qanun layihəsinin başqa ölkələrdə də qəbul edildiyini xatırladıb.

Q. Paşayeva qanunda Azərbaycanın işğal edilmiş ərazilərinə səfər edən şəxslərin, şirkətlərin nümayəndələrinin, deputatların Azərbaycana səfərinə qadağa qoyulmasının əksini tapmalı olduğunu qeyd edib.

Asif