Oqtay Əsədov: “İşimiz gərgin olacaq”

“Bəzi təşkilatlar Azərbaycanda Avropa Yay Olimpiya Oyunlarının keçirilməsinə qarşı mübarizə aparırlar”.

Publika.az-ın məlumatına görə, bu sözləri Milli Məclisin sədri Oqtay Əsədov parlamentin yaz sessiyasının bu gün keçirilən ilk iclasında çıxışı zamanı bildirib.

Onun sözlərinə görə, həmin təşkilatların və şəxslərin Azərbaycan əleyhinə apardığı kampaniya yolverilməzdir.

Yaz sessiyasının başlanması münasibətilə deputatları təbrik edərək, onlara işlərində uğurlar arzulayan O.Əsədov onu da deyib ki, Milli Məclis Azərbaycan dövlətinin yürütdüyü siyasətin uğurlu olması üçün öz öhdəliyinə düşən qanunvercilik prosesini layiqincə yerinə yetirir: “Bilirsiniz ki, bu çağırış parlamentin səlahiyyət müddətinin başa çatmasına az qalıb. Ona görə də işimiz gərgin olacaq. Bu sessiyada hökumətin hesabatı dinləniləcək, büdcənin icrası haqqında qanun layihəsinə baxılacaq, Ombudsmanın hesabatı dinləniləcək və digər qanunlara baxılacaq”.

Xatırladaq ki, Milli Məclisin bugünkü iclasının gündəliyinə 11 məsələ daxil edilib.

Vasif Həsənli