Trampdan ermənilərə BÖYÜK ZƏRBƏ: “907-ci düzəliş” ləğv edilir, Qarabağ... İrəvan TƏŞVİŞDƏ

ABŞ və Rusiyanın Suriya və Ukrayna münaqişələrini müzakirə etmək, həmçinin, bundan sonrakı münasibətlərini ayırd etmək üçün məkan olaraq Bakını seçməsi Azərbaycanın regional və dünya səviyyəsindəki nüfuzunun aydın göstəricisidir. Bu gün ABŞ Silahlı Qüvvələrinin qərargah rəisləri komitəsinin sədri, general Cozef Dunfordla Rusiya Silahlı Qüvvələrinin Baş Qərargah rəisi Valeri Gerasimov məhz Bakıda bir araya gəlir.
Bakının nüfuz mərkəzi olaraq beynəlxalq güclərin münasibətlərini ayırd etməsinə ev sahibliyi etməsi Ermənistanda ciddi təşvişə qarşılanıb.

Publika.az xəbər verir ki, Ermənistanın “lragir” saytı Bakı görüşünün ABŞ-Azərbaycan münasibətlərində yeni mərhələ ola biləcəyini yazıb.

Sayt qeyd edir ki, Azərbaycanın İsraillə münasibətləri Bakı-Vaşinqton xəttində mühüm rol oynayır: “ABŞ “907-ci düzəliş”ə görə Azərbaycana silah sata bilmir. Lakin Azərbaycan İsraildən ən müasir silahları əldə edir. Son zamanlar, İsrailin “Dəmir günbəz” sistemlərini Azərbaycana satdığı haqda məlumatlar çoxalıb. Bu sistemin komplektləri ABŞ-da istehsal edilir və hesab etmək olar ki, Amerika bunları Azərbaycana satmamalıdır. Bununla bağlı Amerika erməni milli komitəsi Ağ Evə şikayət edib, lakin heç bir nəticə yoxdur”.

“Lragir” qeyd edir ki, ABŞ-ın İrana qarşı sərt siyasət yürütməsi regionda Azərbaycanın əhəmiyyətini artırıb.

“Artıq belə fikirlər səslənir ki, Tramp Administrasiyası Azərbaycana qarşı olan “907-ci düzəliş”i ləğv etməyi düşünür. Bu, ABŞ-Azərbaycan-İsrail əməkdaşlığının qarşısındakı maneələrin aradan götürülməsi məqsədinə xidmət edir”, - deyə sayt yazıb.

Qeyd edək ki, “907-ci düzəliş” 1992-ci ildə erməni lobbisinin təşəbbüsü ilə ABŞ Konqresi tərəfindən “Azadlığa Dəstək” Aktına qəbul edilən və Amerikanın Azərbaycana birbaşa dövlət yarıdımını qadağan edən düzəlişdir. Bu düzəlişi Konqresdə Obama Administrasiyası dövründə dövlət katibi vəzifəsini tutan Con Kerri kimi erməni lobbisinə bağlı konqresmenlər qəbul etdirib. Nəticədə bu günə qədər ABŞ Azərbaycana birbaşa dövlət yardımı edə bilmir. Bunun əksinə olaraq işğal olunmuş Azərbaycan torpaqlarında yaradılan qondarma rejimə Vaşinqton tərəfindən dəfələrlə dövlət yardımı olunub. Bu faktın özü də düzəlişin arxasında məhz erməni lobbisinin dayandığını sübut edir. Ermənistanda və İrəvanın Qarabağda yaratdığı qondarma rejimə ən çox dəstəyin Obama Administrasiyası dövründə olması da diqqətdən yayınmır. Məlumatlara görə, bunun əsas səbəbi Con Kerrinin ABŞ xarici siyasət kursuna rəhbərlik etməsi idi.

İndi ABŞ-da situasiyanın dəyişdiyi haqda söhbətlər gəzir. Yeni prezident Donald Tramp “Amerika maraqları hər şeyin üzərindədir” prinsipini əsas götürür. Bu isə Vaşinqtonun regionda Ermənistanla deyil, məhz Azərbaycanla münasibətləri inkişaf etdirməsini şərtləndirir. ABŞ və Rusiyanın yüksək vəzifəli generallarının görüş üçün Bakını seçməsinin arxasında bu amilin dayandığı da şübhəsizdir.

“Lragir” Azərbaycana qarşı düzəlişin ləğv edilməsi ehtimalının gücləndiyini xüsusi vurğulayır. Çünki Donald Tramp ABŞ-dakı erməni diasporunun və lobbisinin nümayəndələrini qəbul etməkdən imtina edib. Bu günə qədər Amerika erməni milli komitəsi və erməni lobbisində təmsil olunan siyasətçilərin cəhdləri nəticə verməyib.

Son dövrlər Ermənistan mediasında müzakirə edilən bir məsələ də bütün bunların fonunda diqqətdən yayınmır. Belə ki, erməni şərhçilər Trampın qapıları erməni lobbisinin üzünə bağlamasından sonra “ABŞ Ermənistan və Dağlıq Qarabağa (qondarma rejim nəzərdə tutulur – red.) yardımı kəsəcək” fikirlərini irəli sürürlər.

ABŞ-Azərbaycan-İsrail əməkdaşlığının güclənməsi fonunda bunun baş verməsi gözləniləndir.

Asif