Nida Təhlil
Bəşəriyyətin xilası üçün Azərbaycan nümunəsi
“İnsanlar hansı dinə, hansı mədəniyyətə mənsubluğundan
asılı olmayaraq, bütün başqa mədəniyyətlərə, dinlərə, mənəvi
dəyərlərə də hörmət etməli, o dinlərin bəzən kiməsə xoş gəlməyən
adət-ənənələrinə dözümlü olmalıdırlar”.
Azərbaycanın ümummilli lideri Heydər Əliyevin bu sözləri ölkəmizdə
dünyaya nümunə olan tolerantlıq mühitini özündə əks etdirir.
Üç il öncə, 2015-ci ilin 9 yanvarında Bakıda baş verən bir hadisə
bütün dünya üçün nümunə oldu. Həmin gün iki gənc axşamdan yağan
qarın örtdüyü kilsənin yolunu təmizləyir və ibadətə gələn
insanların rahat hərəkəti üçün yol açırdı. Onlar xristian deyildi,
sadəcə Allah yaratdığı bütün canlıları sevən müsəlmanlar idi.
Prezident İlham Əliyevin dediyi kimi, “İslam dini dostluq
dinidir”.
Bu örnək həmin tarixdən iki gün öncə Fransada baş verən terrordan
sonra müsəlmanlara qarşı başlayan hücuma ən gözəl cavab idi.
Dünyanın mədəniyyət paytaxtı hesab olunan Parisdə müsəlmanlar təqib
olunur, məscidlər yandırılır, İslamın peyğəmbəri təhqir
edilirdi.
Parisdən çox uzaqlarda isə insanlar kilsəyə gedən yolu qardan
təmizləyirdi.
Bura nə İslam fundamentalizminin hökm sürdüyü Yaxı Şərqdir, nə də
liberal dəyərlərin hakim olduğu Avropa. Bura Bakıdır. Dünyaya bu
qədər sadə və gözəl humanizm örnək yalnız Azərbaycan göstərilə
bilərdi. Çünki bu ölkə əsrlər boyu hər kəsin dini inancına, etnik
tərkibinə hörmətlə, sevgi ilə yanaşıb. Bu ölkədə birinci şəxsdən
tutmuş, sadə vətəndaşa qədər hər kəs qarşılıqlı hörmət, etibarla
yaşayır.
Azərbaycanlı gənclərin aksiyasını şərh edən İsrail eksperti Arye
Qut bizimlə söhbətində belə deyir: “Avropada İslam və xristian
fundamentalistləri tərəfindən radikalizmi müşahidə edirik.
Azərbaycanda isə gənclər xristian və yəhudilərə əsl tolerantlıq
göstərirlər. Çünki Azərbaycan müxtəlif din və xalqların vətənidir.
Bu ölkədə multikulturalizm və tolerantlıq həyat tərzidir. Buna
səbəb Azərbaycan rəhbərliyinin apardığı siyasətdir. Azərbaycan
modeli bu gün dünyada multikultarizm siyasətinin təbliği siyasəti
üçün əsas nümunədir”.
Qafqaz dağlarının qoynunda yerləşən bu torpaqlarda min illərdir
müxtəlif millətlər, dinlər bərabər və sülh şəraitində birgə
yaşayır. Əhalinin 96 faizi müsəlmandır. Lakin xristianlıq və
iudaizm üçün Azərbaycanda həmişə yaxşı şərait var. Xristianların
əksəriyyəti rus pravoslav və gürcü pravoslav kilsəsinə məxsusdur.
Yəhudilərin çoxu dağ yəhudiləri və əşkinazi yəhudiləridir.
Müstəqillik dövründə Azərbaycanda 2 minə yaxın məscid tikilib. Son
10 il ərzində 80 məscid əsaslı təmir edilib. Ölkədə rəsmi şəkildə
525 islam, 34 qeyri-islam təmayüllü dini icma, eyni zamanda, 11
kilsə, 6 sinaqoq fəaliyyət göstərir. Avropanın ən iri
sinaqoqlarından biri 2003-cü ilin mart ayında məhz Bakı şəhərində
açılıb. Hətta Bakının ən mərkəzi küçələrinin birində erməni kilsəsi
fəaliyyət göstərir. Halbuki, Azərbaycanın 20 faiz torpağını işğal
edən Ermənistan həmin ərazilərdəki nəinki məscidləri, insanların
qəbirlərini belə dağıdıb. Atalarının, analarının qəbirləri
dağıdılan, evlərindən, doğma yurdlarından didərgin düşən insanlar
həmin erməni kilsəsini yerlə-yeksan edə bilər. Lakin Azərbaycan
xalqı üçün həmişə əsas olan bir məsələ var: tolerantlıq; başqasına
aid inanclara hörmət, bəşəri dəyərlərə qiymət. Bu ölkənin əsrlər
boyu ayaq üstə qalmasında ən mühüm rol oynayan amillərdən biri də
məhz budur.
Arye Qut Azərbaycan torpaqlarını işğal edən Ermənistandakı
vəziyyətə nəzər salır: “Sovet İttifaqının dağılmasından sonra
Ermənistanda yəhudi xalqının nümayəndələri kəskin şəkildə azaldı.
Ermənistanda antisemitizm güclənməsi və indiyə qədər davam edən
iqtisadi çöküş yəhudiləri bu ölkədən qaçmağa məcbur etdi. Son 20
ildə Ermənistanda yəhudilərin sayı 5000-dən yüzə qədər azalıb”.
Onun sözlərinə görə, Cənubi Qafqazda və bütün dünyada bu qədər
tolerant ölkə yalnız Azərbaycandır.
A. Qut Azərbaycandakı tolerantlığa nümunə kimi azərbaycanlılarla
yəhudilərin yüz illər boyu birgəyaşayışını göstərir. Onun sözlərinə
görə, son dövrlər iki xalq arasında bağlılıq daha da artıb: “Buna
səbəbsə ölkənin birinci şəxsi İlham Əliyevin siyasətidir. Dövlət
başçısı və onun xanımı Mehriban Əliyevanın təşəbbüsü ilə ölkədə iki
sinaqoq və Cənubi Qafqazda ən iri yəhudi təhsil mərkəzi inşa
edilib”.
İsrailli ekspert Azərbaycanın dünyada tolerantlığın sığındığı
yeganə məkan kimi xarakterizə edib.
“Bu ölkə əsl sülh göyərçinidir”, - deyə o qeyd edib.
Hazırda dünyada baş verənlərə nəzər saldıqda, Azərbaycanı heç kəsin
dini etiqadına, milli kimliyinə görə təqiblərə məruz qalmayan
yeganə ölkə adlandırmaq olar.
Prezident İlham Əliyev bu barədə deyir: “XXI əsrdə
multikulturalizmin alternativləri demək olar ki, yoxdur. Bunun
alternativi ayrı-seçkilikdir, ksenofobiyadır, rasizmdir, faşizmdir.
Mən hesab edirəm ki, XXI əsrdə mütərəqqi bəşəriyyət bu xoşagəlməz
meyllərin qarşısının alınması üçün daha da fəal olmalıdır...Biz bu
məsələdə dünyaya müsbət təcrübə göstərməliyik. Çünki Azərbaycanda
bu sahədə qazanılan təcrübə müsbət təcrübədir”.
Azərbaycanda tolerantlıq Konstitusiya ilə qorunur. Əsas Qanunun
48-ci maddəsinə əsasən, hər kəsin vicdan azadlığı, dinə
münasibətini müstəqil müəyyənləşdirmək, hər hansı dinə təkbaşına və
ya başqaları ilə birlikdə etiqad etmək, yaxud heç bir dinə etiqad
etməmək, dinə münasibəti ilə bağlı əqidəsini ifadə etmək və yaymaq
hüququ vardır.
Əsas qanundan çıxış edən Azərbaycan rəhbərliyi bu hüquq dövlət
səviyyəsində təmin edir. Nəticə etibarilə bu gün Azərbaycanda
müsəlmanlarla yanaşı, pravoslav, Roma-katolik konfessiyaları,
protestantlığın müxtəlif cərəyanları olan Yevangel-lüteranlar,
Yevangel xristian baptistləri, 7-ci gün adventistləri, Molokan
xristianları, Alban-udi xristian dini icması, Avropa yəhudiləri -
əşkinazilər, dağ yəhudiləri olan sefartlar, gürcü yəhudiləri,
ənənəvi olmayan din qruplardan krişnaçılar, bəhailər və s. dinlərin
mənsubları tolerantlıq, əmin-amanlıq içində yaşayır və öz dini
etiqadlarını rahat şəkildə yerinə yetirirlər. Ölkədə onlarla
qeyri-islam təmayüllü məbədlər fəaliyyət göstərir. Qubada
yəhudilərə məxsus olan “Qırmızı” qəsəbə isə tolerantlığın əsl
nümunəsidir. Bu qəsəbə təkcə postsovet məkanında deyil, bütün
dünyada dağ yəhudilərinin kompakt yaşadıqları yeganə yerdir.
Alban-Udi Xristian dini icmasının sədri Robert Mobili Azərbaycanda
yaşamağın olduqca rahat olduğunu bildirir. Onun sözlərinə görə,
Azərbaycanda yaşayan dinlər və xalqları birləşdirən əsas dəyər
Azərbaycançılıq fəlsəfəsi olub: “Burada dinlərarası dialoqda heç
bir problem yaşanmır. Hər kəs öz adət-ənənələrini, dini inanclarını
heç bir təzyiq olmadan müstəqil şəkildə yerinə yetirir. Bu məqam
Avropanın diqqətini çəkir. Avropalılar Azərbaycanda olan bu unikal
modelin təcrübəsini öyrənməkdə maraqlıdır”.
Təsadüfi deyil ki, Bakı 2009-cu ildə İslam Mədəniyyəti paytaxtı
elan edildi. 2016-cı il Azərbaycanda “Multikulturalizm İli” oldu.
İSESKO tərəfindən 2018-ci il üçün “Naxçıvan İslam mədəniyyətinin
paytaxtı” elan edilib. Gəncə və Şəki də “İslam mədəniyyətinin
paytaxtları” layihəsində iştirak edəcək. Bütün bunlar dünyanın
ölkəmizə tolerantlığın yüksək səviyyədə inkişaf etdiyi məkan kimi
etimad göstərməsinin nəticəsidir.
Milli Tolerantlıq Mərkəzinin rəhbəri Elmin Əliyev tolerantlığın
inkişafında Azərbaycan modelinin xüsusi yerinin olduğunu hesab
edir. Onun sözlərinə görə, müsəlmanlar, xristianlar, yəhudilər üçün
Azərbaycan həmişə ən ideal məkan olub: “Azərbaycanda hər kəs öz
dini inancını, sosial fəaliyyətini rahat şəkildə yerinə yetirə
bilir”.
E. Əliyev dünya ölkələrinin bu təcrübəni öyrənməsinin vacibliyini
qeyd edib.
“Dünyanın indiki qarışıq vəziyyətində tolerantlıq və
multikulturalizm ən yaxşı çıxış yolu ola bilər. Fikrimcə,
Azərbaycan bu işdə dünyaya kömək edə bilər” , - deyə o
bildirib.
Asif Nərimanlı
Yazı Azərbaycan Respublikasının Dini Qurumlarla İş üzrə Dövlət
Komitəsinin tabeliyində Mənəvi Dəyərlərin Təbliği Fondunun “Media
və mənəvi dəyərlər” mövzusunda keçirdiyi müsabiqəyə təqdim
olunur
-
Magazin123:26
Xumar Qədimova daha bir məşhur şeiri mahnıya çevirdi - VİDEO
-
İnanc23:02
Həcc ziyarəti ilə bağlı zəvvarlara XƏBƏRDARLIQ
-
Region22:37
Başqa çıxış yolumuz yoxdur - Paşinyan
-
Hadisə21:47
Dörd aylıq körpə binadan necə düşüb? - Hadisə yerindən GÖRÜNTÜLƏR
-
Magazin121:35
Günelə nə olub? - Xəstəxanadan görüntüsünü paylaşdı və... - FOTO
-
Hadisə21:10
Qırmızı işıqda keçən nazirin maşını aşdı - FOTO
-
Magazin120:22
Müğənni Yalının qohumu sevgilisi tərəfindən qətlə yetirildi - FOTO
-
Dünya19:57
Zelenski onu yeni vəzifəyə təyin etdi