Azərbaycan Sudana sülhməramlı göndərəcək - Milli Məclis razılıq verdi

“Azərbaycan Ordusunun 4 nəfərdən ibarət hərbi heyətinin "qərargah zabit" və "hərbi müşahidəçi" qismində UNMİSS-in komandanlığı altında Cənubi Sudan Respublikasında yerləşdirilməsinə və missiyada iştirak etməsinə razılıq verilməsi haqqında layihə Milli Məclisdə müzakirə edilib.

Publika.az xəbər verir ki, layihə barədə birinci vitse-spiker Ziyafət Əsgərov məlumat verib.

Z.Əsgərov Kosova, İraq, Əfqanıstanda Azərbaycan sülhməramlılarının iştirakına diqqət çəkib:

“Bu əməliyyatlara NATO komandanlığı rəhbərlik edir. Bütün proseslər BMT-nin Təhlükəsizlik Şurasının mandatı altında həyata keçirilir. Bizə təqdim edilən layihədə bu missiyanı BMT öz üzərinə götürür. Bu missiyaya qoşulmaqla Azərbaycan dövləti və Prezidenti sülhsevər siyasətini ortaya qoyur. Biz istəyirik ki, bütün ölkələrdə sülh olsun. Dövlətimiz və Prezidentimiz də bu məsələdə maraqlıdır. Bu məsələnin Milli Məclisdə təsdiqi təklif edilir. Biz bir daha təsdiq edirik ki, BMT-nin qarşıya qoyduğu məqsəd və vəzifələrə sadiqik. Biz də çox istərdik ki, BMT Təhlükəsiz Şurası Azərbaycana münasibətdə qəbul etdiyi qərarların icrasına daha məsuliyyətlə, daha ciddi yanaşsın”.

Layihə səsə qoyularaq qəbul edilib.

Gülxar