DİN: İddiaların həqiqətlə heç bir əlaqəsi yoxdur

"Narkotiklərin qanunsuz dövriyyəsinə görə əvvəllər iki dəfə məhkum olunmuş, hazırda anoloji cinayət əməlində təqsirləndirilərək məhkəmə tərəfindən barəsində həbs qətimkan tədbiri seçilmiş Salyan rayon sakini Natiq Əsgərovun sosial şəbəkələrdə və bəzi xəbər saytlarında yayılmış müraciətində guya polis tərəfindən şərlənməsi barədə iddialarının həqiqətlə uzaqdan- yaxından heç bir bağlılığı və əlaqəsi yoxdur".

Bu barədə Publika.az-a açıqlamasında Daxili İşlər Nazirliyi Mətbuat xidmətinin rəis müavini, polis polkovniki Orxan Mansurzadə bildirib.

Onun sözlərinə görə, istintaq təsridxanasından özünün günahsızlığı barədə fikirlər səsləndirən, yaşadığı çevrədə, əhatəsində olan insanları, əsasən yeniyetmə və gəncləri, sözün birbaşa mənasında, zəhərləyən, onların həyat və sağlamlıqlarına sağalmaz yara vuranlardan birinin indi əsassız həbs olunmasından danışmasının, buna görə polis əməkdaşlarını hansı mənəvi haqla ittiham etməsinin özü, zənnimizcə, təəccüblü olduğu qədər də düşündürücüdür:

"Cari il mayın 31-də Neftçala rayonu ərazisində şərləndiyini iddia edən bu şəxsin növbəti dəfə “ağ ölüm”lə yaxalanması faktı əldə edilmiş məlumat əsasında polis əməkdaşlarının peşəkarlıqla həyata keçirdikləri, klassik anlamda sırf əməliyyat mahiyyətli tədbirlərdən biridir.

İndi özünün günahsızlığından dəm vuran N.Əsgərov satış məqsədilə, qanunsuz olaraq narkotik vasitə olan heroin əldə edərək bu il mayın 31-də Neftçala rayonunun Xıllı qəsəbəsi ərazisində qəsəbə sakini V.Sultanova satıb və elə həmin tarixdə axşam radələrində polis əməkdaşları tərəfindən keçirilmiş əməliyyat tədbirləri nəticəsində Neftçala şəhəri ərazisində şübhəli kimi saxlanılaraq RPŞ-yə gətirilib. Şöbədə hal şahidlərinin iştirakı ilə üzərində aparılmış şəxsi axtarış zamanı şalvarının cibindən 1 (bir) ədəd polietilen bükümdə heroin aşkar olunaraq götürülüb.

Qeyd etdiyimiz bu, qeyd etmədiyimiz digər xüsusatlar, hüquqi prosedurlar mövcud cinayət-prosessual qanunvericiliyinin tələbləri ciddi nəzərə alınmaqla həyata keçirilərək sənədləşdirilib, N.Əsgərov və V.Sultanov vəkillə təmin olunublar. Hər ikisi CM-in müvafiq maddələri ilə nəzərdə tutulan cinayət əməlini törətməkdə əvvəlcə şübhəli şəxs kimi saxlanılıb. Daha sonra hər iki şəxsə ittiham elan olunub və məhkəmə tərəfindən barələrində həbs qətimkan tədbiri seçilib.

Maraqlıdır ki, şərlənəndiyini iddia edən N.Əsgərov törətdiyi cinayəti etiraf edərək əməlindən peşiman olduğunu bildirib, üzərində aşkarlanmış heroini isə guya özünün qəbul edəcəyi ilə əsaslandırmağa çalışıb. Fakt qarşısında qalıb törətdiyi qanun pozuntusundan səmimi peşimançılığını ifadə edən bu şəxsin narkovasitələrin satışı ilə məşğul olmasını inkar edəcək qədər “cəsarət” nümayiş etdirməsi əlbəttə ki, Natiq Əsgərovun stajlı məhkum olmasından, narkotikanın alqı-satqısına görə Cinayət Məcəlləsində daha ağır cəzanın nəzərdə tutulduğunu bilməsindən irəli gəlir".