Bərpa prosesinin məhz Şuşadan başlaması bir mesajdır

“Ölkə başçısının Şuşaya səfəri və Füzulidə hava limanının təməlqoyma mərasimində iştirakı gözlənilən məsələ idi. Prezident təhlükəsizliklə bağlı müəyyən problemlərə baxmayaraq, borcu bilir ki, məhz öz addımları ilə prosesi sürətləndirsin”.

Bunu Publika.az-a açıqlamasında Böyük Quruluş Partiyasının sədri, millət vəkili Fazil Mustafa ölkə Prezidenti İlham Əliyevin Şuşa və Füzuli səfərlərini şərh edərkən deyib. Millət vəkili bildirib ki, bu da cəmiyyətdə mənəvi baxımdan dəyişim deməkdir:

“Eyni zamanda, insanların gələcəyə inamını artırma baxımından olduqca önəmli addımdır. Prezidentin bu istiqamətdə atdığı addımlar, Füzulidə hava limanının təməlqoyma mərasiminin keçirilməsi Füzulinin bərpası ilə bağlı bir düşüncənin təqdim olunması deməkdir. Bundan başqa, Şuşaya Xurşidbanu Natəvanın heykəlinin daşınması Natəvanın adı ilə bağlı olan Şuşa mənəvi aurasının yeniləşməsi anlamına gəlir. Bu həm də bir mesajdır”.

Deputatın fikrincə, bu o deməkdir ki, artıq işğaldan azad olunmuş torpaqlarda Azərbaycan Prezidenti mütləq mənada bu torpağın sahibi olduğunu nümayiş etdirir:

“Bütün bunlar bizim üçün yeni bir dövrün başlanğıcıdır. Bərpa dövrünün məhz Şuşadan başlaması, məhz bu davranışlarla mesajın verilməsi olduqca vacibdir. Çünki cəmiyyətimizdə gələcəyimiz, Qarabağın bərpası, dirilişi ilə bağlı müsbət əhval-ruhiyyənin yaranmasına xidmət edir”.

Tural Turan