Rusiya NATO ilə birgə hərəkətə keçəcək - 10 ildən sonra...

Pakistanda “AMAN-2021” beynəlxalq hərbi təlimləri keçiriləcək.

Publika.az xəbər verir ki, təlimlərdə Pakistan Hərbi Dəniz Qüvvələri və Rusiya Qara Dəniz Donanmasının gəmiləri, həmçinin Böyük Britaniya Kral Donanması, ABŞ Donanması, Çin Xalq Respublikasının Donanması, Yapon Hərbi Dəniz Müdafiə Qüvvələri, Türk Hərbi Dəniz Qüvvələri, Filippin Hərbi Dəniz Qüvvələri, Şri-Lanka Donanması və İndoneziya Donanması, Malayziya Krallığı Hərbi Dəniz Qüvvələri iştirak edəcək.

Təlimlərdə iştirak 30-dan çox ölkənin nümayəndələri tərəfindən təsdiqlənib. Bunlardan 10-a yaxını öz donanmasını göndərəcək, qalanları rəsmi müşahidəçilər ezam edəcək.

Təlimlər gələn ilin fevralında Karaçi sularında keçiriləcək.

“AMAN-2021” təlimlərinin məqsədləri dənizdəki təhlükəsizlik və sabitlik naminə iştirakçı ölkələr arasında hərbi əməkdaşlığı gücləndirmək və inkişaf etdirmək, eyni zamanda, intensiv gəmiçilik sahələrində dəniz quldurluğu təhdidlərini dəf etmək üçün dənizçilər arasında təcrübə mübadiləsi aparmaqdır.

Qeyd edək ki, son dəfə Rusiya Donanmasının gəmiləri Şimali Atlantika İttifaqının (NATO) gəmiləri ilə birlikdə 2011-ci ildə “Bold Monarx” təliminin bir hissəsi olaraq İspaniya sahillərində işləmişdi.

Zümrüd