Zurabişvili Trampa çağırış etdi: Gürcüstanı bu ölkədən qoruyun!

Gürcüstanın keçmiş prezidenti Salome Zurabişvili Donald Trampı ölkəni Rusiyadan qorumağa çağırıb.

Publika.az xəbər verir ki, bu barədə “The Hill” qəzeti məlumat yayıb.

"Birləşmiş Ştatlar Gürcüstandan “oyun meydançası” kimi istifadə edən Rusiyaya cavab verməlidir", - nəşr Zurabişvilinin sözlərindən sitat gətirib.

Eks-prezident qeyd edib ki, Trampla Parisdə görüşü zamanı ona Gürcüstanın ABŞ-ın unutmamalı olduğu strateji region olduğunu deyib. O əlavə edib ki, “Vaşinqton bu regionun Moskvaya keçməsinə icazə verə bilməz”.

Zurabişvili ABŞ-ın keçmiş prezidenti Co Baydenin administrasiyasını da tənqid edərək bildirib ki, o, demokratiyaya üstünlük versə də, faktiki olaraq son iki ildə Gürcüstanda demokratiyanın qorunması üçün heç bir iş görməyib.

Qeyd edək ki, ötən il dekabrın 29-da Mixeil Kavelaşvili rəsmi olaraq Gürcüstan prezidenti vəzifəsinin icrasına başlayıb.

Xatırladaq ki, eks-prezident saraydan getdiyini, özü ilə “legitimliyi və bayrağı” götürdüyünü, lakin xalqla “qalacağını” və yeni parlament seçkilərinin təyin edilməsi üçün mübarizə aparacağını bildirib. O, hələ də oktyabrın 26-da keçirilmiş parlament seçkilərinin nəticələrini və buna uyğun olaraq Kavelaşvilini prezident kimi tanımır və bütün inauqurasiya prosesini “parodiya” hesab edir.

Adəm Abbaslı