Pekinin Qafqaz strategiyası: Moskvadan İrəvana xəbərdarlıq - Ondan sonra məyusluq gəlir

Ermənistan Çin üçün Cənubi Qafqazda mühüm nöqtədir, lakin Pekin hələ də İrəvanla dərin və uzunmüddətli əməkdaşlıq qurmayıb.

Publika.az xəbər verir ki, bu barədə Moskva Dövlət Universitetinin Asiya və Afrika Araşdırmaları İnstitutunun direktoru, professor Aleksey Maslov İstanbulda rusdilli xarici media üçün media forumu çərçivəsində “Sputnik Ermənistan”a müsahibəsində bildirib.

Onun sözlərinə görə, Pekin Qafqazda xüsusi oyun oynayır. Ermənistan və Çin arasında strateji sazişin imzalanması genişmiqyaslı əməkdaşlığın başlanğıcından daha çox dialoqa hazır olmaqdan xəbər vermək cəhdi idi.

Şərqşünas qeyd edib ki, Çinin əsas marağı logistika ilə bağlıdır.

"Çin üçün alternativ təchizat kanallarını inkişaf etdirməklə risklərdən qaçmaq vacibdir. Bu baxımdan Ermənistan Azərbaycan və Türkiyədən keçən ənənəvi marşrutdan yan keçəcək potensial mərkəz kimi görünür", - Maslov bildirib.

Ekspert vurğulayıb ki, yaxın onilliklərdə qlobal iqtisadiyyatda logistika marşrutlarına nəzarət uğrunda mübarizə hökm sürəcək. Bu marşrutlar malların son qiymətini müəyyən edir. Xarici ticarətdən asılı olan Pekin başa düşdü ki, təkcə istehsal deyil, həm də onları sərfəli şəkildə daşımaq vacibdir.

“Artıq Çinin Azərbaycan və Türkiyədən keçməklə Avropaya operativ marşrutları var. Lakin əsas məqsəd tədarükləri paralelləşdirməkdir: marşrutlar nə qədər çox olarsa, asılılıq da bir o qədər az olar və risklər azalır. Bu kontekstdə Şimal Dəniz Yolu və Mərkəzi Asiyadan keçən dəhlizlərlə yanaşı, Cənubi Qafqaz və xüsusilə Ermənistan alternativ marşruta çevrilir”, - ekspert vurğulayıb.

Maslov qeyd edib ki, son vaxtlar Çin və Polşa arasında gərginliyin artması mövcud marşrutların zəifliyini nümayiş etdirib: hər an bu ölkə vasitəsilə tədarüklər dayandırıla bilər.

Eyni zamanda ekspert İrəvanı həddindən artıq nikbinliyə qarşı xəbərdarlıq edib.

“Çin güclü sərmayəçi ola bilər, lakin Yaxın Şərq və region ölkələrinin təcrübəsi göstərir ki, bir müddət xoşbəxtlikdən sonra məyusluq dövrü gəlir”, Maslov qeyd edib.

Tural