Ermənistanda qalmaqallı qətl: Müxalif icma rəhbəri və DİN əməkdaşı öldürüldü

Parakar icmasının rəhbəri Volodya Qriqoryanla birlikdə Ermənistan Daxili İşlər Nazirliyinin Cinayət Axtarış İdarəsinin əməliyyatçısı Karen Abramyan da öldürülüb.

Publika.az xəbər verir ki, bu barədə “Sputnik Ermənistan”a ölkənin Daxili İşlər Nazirliyi məlumat verib.

Bundan əvvəl Ermənistan Daxili İşlər Nazirliyinin mətbuat xidməti Parakar icmasının rəhbəri Volodya Qriqoryan və dostunun Merdzavanda öldürüldüyü barədə məlumat yayıb.

Hadisə nəticəsində daha bir nəfər yaralanıb. Daxili İşlər Nazirliyinin məlumatına görə, yaralı Artsrun Qalstyandır və hazırda əməliyyat olunur.

Ermənistan İstintaq Komitəsi adam öldürmə və adam öldürməyə cəhd maddələri ilə cinayət işinin başlandığını açıqlayıb. Cinayət yerindən çoxlu sayda pulemyot gilizləri aşkar edilib.

Xatırladaq ki, Parakar icmasında seçkilər 2025-ci il martın 30-da keçirilib. Nəticələrə görə, hakim “Mülki Müqavilə” partiyası “Birlik” blokuna uduzub. İcmanın rəhbəri “Birlik” blokunun nümayəndəsi Volodya Qriqoryan seçilib.

Tural