"Casus şəbəkəsi" işi üzrə müttəhimlərə ölüm hökmü çıxarıldı

İranın məhkəmə orqanları Kərəcdə "Mossad" və "Mücahidin-e Xalq" təşkilatı ilə əlaqəli olduğu iddia edilən "casus şəbəkəsi" işi üzrə iki müttəhimin edam cəzasına məhkum edildiyini açıqlayıb.

Publika.az xəbər verir ki, bu barədə "Azad İran" "Telegram" kanalı məlumat yayıb.

Yayılan xəbərlərə görə, bu şəxslər digər iki ittiham edilən şəxslə - İsfahandan olan ər-arvad ilə birlikdə "moharebe" (Allaha qarşı müharibə aparmaq), "Düşmən qruplaşmalarla əməkdaşlıq", "Ölkənin milli təhlükəsizliyə qarşı sui-qəsd və hərəkətlər" və "Rejimə qarşı təbliğat fəaliyyəti" ittihamları üzrə Kərəc məhkəməsi qarşısına çıxarılıblar. Digər ikisi uzunmüddətli həbs cəzası alıblar - ümumilikdə 26 ildən çox.

Ədliyyə orqanlarının iddiasına görə, müttəhimlər İsrail kəşfiyyatında təlim keçiblər və hərbi obyektlərin yandırılması, Tehrandakı hərbi mərkəzə hücum cəhdi də daxil olmaqla, aksiyalarda iştirak ediblər. Həmçinin onlardan istifadəyə hazır partlayıcı mərmilərin də müsadirə edildiyi bildirilir.