Paşinyanla mübahisə Köçəryan ailəsinə baha başa gəldi - Eks-prezident və oğlu saxlanıldı

Ermənistanın ikinci prezidenti Robert Köçəryan və böyük oğlu Sedrak Köçəryan saxlanılıb. Onlar hazırda Korrupsiyaya Qarşı Mübarizə Komitəsindədir.

Publika.az xəbər verir ki, bu barədə “Sputnik Ermənistan”a Korrupsiyaya Qarşı Mübarizə Komitəsindən məlumat verilib.

Köçəryanın ofisinin rəhbəri Baqrat Mikoyan bildirib ki, eks-prezidentin kiçik oğlu, deputat Levon Köçəryan isə öz mənzilindədir. Səhər saatlarından etibarən onun evində axtarış aparılır.

Bildirilib ki, Korrupsiyaya Qarşı Mübarizə Komitəsi cinayət işi çərçivəsində onlarla ünvanda axtarış və digər prosessual tədbirlərin keçirildiyini daha əvvəl açıqlayıb. Səhər saatlarında hüquq-mühafizə orqanlarının əməkdaşları Robert Köçəryanın evinə gəlib və onu Korrupsiyaya Qarşı Mübarizə Komitəsinə aparıblar.

Qeyd edək ki, hadisələr avqustun 24-də parlamentdə Levon Köçəryanla Ermənistanın baş naziri Nikol Paşinyan arasında baş verən mübahisədən sonra baş verib.

Paşinyan deputata məxsus bütün əmlakın əlindən alınacağı ilə bağlı hədələyici açıqlama verib. Baş nazir bildirib ki, Levon Köçəryan həmin əmlakı övladlarına və nəvələrinə miras qoya bilməyəcək.

Gecə saatlarında isə erməni mediasında Paşinyanın hüquq-mühafizə orqanlarına Robert Köçəryan və onun oğullarına qarşı proses başlatmaq tapşırığı verdiyi barədə məlumatlar yayılıb.

Müəllif: Adəm