Azərbaycan AQEM çərçivəsində media əməkdaşlığına xüsusi diqqət ayırır

Azərbaycan AQEM çərçivəsində media və kommunikasiya sahəsinin inkişaf etdirilməsinə, üzv dövlətlərlə ikitərəfli və çoxtərəfli əməkdaşlığın genişləndirilməsinə xüsusi önəm verir.

Publika.az xəbər verir ki, bu barədə Azərbaycan Prezidenti İlham Əliyevin “Qütbləşmiş dünyada media vasitəsilə etimadın qurulması” mövzusunda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Media Forumunun iştirakçılarına müraciətində qeyd olunub.

Prezident müraciətində tərəfdaşlıq mexanizmlərinin təkmilləşdirilməsinin əhəmiyyətini ifadə edib:

"Son illər ərzində müxtəlif media qurumları arasında formalaşmış tərəfdaşlıq əlaqələri, eləcə də AQEM üzv dövlətlərinin media nümayəndələrinin Azərbaycanın ev sahibliyi etdiyi tədbirlərdə iştirakı praktiki əməkdaşlıq üçün zəmin yaradıb. Bu xüsusda Media Forumunun keçirilməsi işbirliyinin yeni məzmunla zənginləşdirilməsi baxımından əlamətdar hadisədir".

Dövlət başçısı Forumun dost ölkələrin nüfuzlu media nümayəndələri arasında dürüst, effektiv və çevik kommunikasiya üzrə təcrübə mübadiləsinə böyük töhfə verəcəyinə əminliyini bildirib.