• USD 1,7000 0,00% EUR 2,0264 +0,09%
    • GBP 2,3680 +0,13% RUB 0,0233 0,00%

Vaksin ölümə səbəb ola bilərmi? - Professor açıqladı

Vaksin ölümə səbəb ola bilərmi? - Professor açıqladı

Vaksinlə bağlı çoxsaylı fikirlər var. Sosial şəbəkələrdə koronavirus vaksini ilə bağlı müəyyən məlumatlar yayılıb. Hətta bəzi alimlərin və tədqiqat mərkəzlərinin adından danışılır. İlk növbədə onu qeyd edim ki, 2019-cu ildə Ümumdünya Səhiyyə Təşkilatı insan sağlamlığını təhdid edən 10 amili qeyd edib. Onlardan biri vaksin tərəddüdü və anti-vaksin kampaniyasıdır.

Bu sözləri Publika.az-a açıqlamasında professor Adil Qeybulla deyib. Həkim bildirib ki, vaksin bu gün elmin insanlığa bəxş etdiyi ən böyük dəyərdir, vaksinasiya nəticəsində dünyada 500 milyon insanın həyatına son qoyan təbii çiçək kimi pandemiya yoxa çıxıb, taun xəstəliyi bu gün təbabətin hesabına yoxa çıxıb:

“Bütün bunlar onu göstərir ki, vaksinasiyaya münasibətdə fikirlər yanlış ola bilər və yanlışdır. Viruslar öz genomunda həyatın qeyri-hüceyrəvi formasıdır, DNT və RNT tərkibli olur. DNT tərkibli viruslar daha stabildir, RNT tərkibli viruslar isə mutasiyaya uğramaq qabiliyyətinə malikdir. Bu gün A qrip virusunun 2000-dən çox ştammı var, hər il yeni bir ştammla peyda olur. Koronavirus ailəsinin 40 növü var, onlardan 7-si insanda xəstəlik törədir, 4-ü hər il mövsümi soyuqdəyməyə səbəb olur. SARS-1, MERS və SARS-2 virusu təhlükəli formalar kimi qeydiyyata düşür və bu viruslar mutasiyaya uğrayırlar. SARS-2 SARS-1-in analoji variantıdır, mutasiyanın bir formasıdır. Bu gün də SARS-2 virusunun özünün mutasiyaları var. Mutasiyaya uğradığına görə də bu infeksiyaların vaksini uzunmüddətli təsirə malik ola bilməz, qrip kimi. Qripin indiyə kimi universal vaksini yoxdur, hər il yeni vaksin icad olunur”.

A.Qeybulla əlavə edib ki, peyvəndlər ölümə səbəb olmur:

“Vaksinasiya müvəqqəti aparılan bir tədbirdir ki, insanlarda kollektiv immunitet yaransın. İstər vaksin, istərsə də yoluxma nəticəsində insanlarda immunitet formalaşır. Bu immunitet yetərincə olmaya bilər, hər halda müəyyən bir immunitet formalaşır və insanlar kollektiv immunitetə yaxınlaşırlar. Bir populyasiyada təxminən 70-75% insanın immun sisteminin formalaşması yetərlidir ki, orada infeksiya yoxa çıxsın. Vaksinin ölümə səbəb olması barədə deyilən fikirlər əsassızdır. Kütləvi vaksinasiya şəraitində tarix boyu müəyyən problemlər yaranıb. Denge qızdırmasının, donuz qripinin kütləvi vaksinasiyasında müəyyən problemlər olub, amma qarşısı vaxtında alınıb. Koronavirus vaksinasiyasının yaxın nəticələri ilə bağlı hələlik problem yoxdur. Əmin olmaq lazımdır ki, dünyanın xəstəliklərə nəzarət və profilaktika mərkəzləri bunu ciddi şəkildə izləyir. Odur ki, şayiələrə inanmaq lazım deyil. Vaksinasiya aparılmağa davam etməlidir, ən azından insanlarımızı xilas etməliyik”.

Aytən Məftun

Halal Nemət

Xəbər lenti

DAHA ÇOX XƏBƏR